قصتنا مع الفايس بوك-الجزء الاولاني

شو بدي إحكي حتى إحكي عن الفايسبوك، بالأول حتى تشترك رغبوك، على أساس إنو بتتواصل مع قرايـبينك لجهة إمك وأبوك، وتفتش عن أصدقاء الطفولة والدراسة يللي نسيوك، وتتعرف على ناس جداد، إذا عملت آد واستقبلوك، كصديق جديد بالتعارف ممكن تصيروا أصحاب إذا ناسبوك، ومن ناحية تانية بتـتبادل أصناف الثقافة والعلوم ومن خبرتهم بالحياة بتزيدهن وبيزيدوك، وإذا احتجت خدمة بيقدمولك أو نصيحة بيعطوك.

طلع الموضوع مش هيك وبيًن مكمن العلة والتوك. في ناس مش لعلمك وفهمك بيقبلوك، كرمال لون عيونك صدقني و لجمال اللوك، كل يللي بدن إياه، إنك تبوسن ويبوسوك، وبعدين تضمهن ويضموك، وفي منهن للرزايل أحيانا بيـدفشوك، شي ببلاش وفي شي عليه بالمصاري بــيدفعوك.

وفي مين ما بدن لا تحكيهن ولا يحكوك لا تدسهن ولا يدسوك، بدهن إياك زيادة عدد بلائحة الفراندز يعبًوك، ويتركوك هونيك وينقعوك، دعاية لإلـهن حتى تشوف فساتينن وتسمع أغانيهن وعلى صورهن بـيفرجوك، حتى تعلق "يا جمالو" شو هالقامة شو هالهضامة نيال يللي صوروك

وفي منهن بلائحتهن بيضبوك، حتى وقت الحاجة على الساحة ينزلوك ، تعا يابا نتحداهن هولي أهانوني وأهانوك، فوت شارك بهالغروب نحارب يللي عم يسبوا نبـينا أو يسبوا نايـبنا وأبناء منطقـتنا واللي جابوك. وبـيبلش رشق الصرامي وبـيفلتو على بعض متل الديوك. وهوليكي الملاعين حابكين العملية وكل هدفهن إنو يستفزوك، وحتى تـنمي عدد مشتركينهن بالغروب يستدرجوك، ويوقعوك بالعصبية وتتراشقوا بالألفاظ النابية ويطق عندك شرش الحيا وعن ولاد بلدك يفرقوك،

والملاعين يللي ورا الفايسبوك عارفين شو عاملين، عندهن عن الكل داتابايز ومعلومات ويوما ما من نص بيتك إذا بدهن بيشدوك. فخلي عندك على طول، حسن تقدير وحكمة حتى ما يستغلوك، وبتخريب مجتمعك يغطسوك. هالموقع خلي إستعمالو لـلم الشمل، للإفادة والإستفادة مع التسلية، مش حتى من تيابك يطلعوك، أو لتسب وتشتم ويرجع غيرك لحتى ينتقموا منك فا يسبوك