على مين بدهن يضحكوا...على مين؟

في أربع تلاميذ مع بعض ساكنين .. بشقة خاصة للطلبة الجامعيين .. وكان على موعد الإمتحان في يومين باقيين. قرروا هالطلبة يقضوا أول نهار درس حتى يكونوا للامتحان حاضرين .. والنهار التاني يروحوا رحلة يقعدوا بأحضان الطبيعة بقلب غابة الشربين

أول نهار قضوه درس متل ما كانوا متفقين .. وتاني نهار راحوا عالبرية ضحكوا ولعبوا ورجعوا آخر النهار مبسوطين. بس من كتر ما كانوا تعبانين .. على وجهن طب راحوا نايمين

طلع الصبح على المساكين .. صارت الساعة تسعة وبعدهن جاثمين .. وبلش وقت الامتحان وهني بعدهن بالبيت من التعب خامدين. ما حدا فاق من هالمعترين .. إلا على الساعة عشرة على طبشة باب الجيران المزعجين. من نومهن قاموا ساعتها متل المجانين .. وهرولوا بسرعة على الإمتحان وفكروا بحيلة يضحكوا فيها على إستاذ المادة هني ورايحين

إتـفقوا على الحيلة هالملعبين .. وما طلعوا على قاعة الامتحان إلا ما كل واحد منهن استلم دولاب سيارة مقلعطة كانت مصفوفة على اليمين .. حتى صارت ايديهن من الدواليب مشحبرين

 قالولو يا إستاذ الصبح نحنا وعلى الامتحان جايين.. إنفجر معنا دولاب السيارة، الظاهر كنا على شي مسمار داعسين .. شوف إيدينا من الدولاب كيف بعدهن موسخين .. وتأخرنا زيادة لأتو الدولاب كانوا براغيه مملصين. إيدنا بزنارك، نحنا للإمتحان كتير محضرين. اعطينا فرصة ولا تسقطنا بالمادة وتصير جرصة .. على علامات هالمادة من كتر ما درسنالها كتير معتمدين

وافق الإستاذ بعد حين .. إنو يعيد الامتحان لهالطلاب لأنهن معذورين .. على قد ما نقوا عليه هالمرغين. وزعهن كل واحد بغرفة، حتى ما يكونوا من بعض للأجوبة ناقلين .. وعطاهن ورقة أسئلة جديدة أجوبتهن كتير سهلين

ما مرق خمس دقايق إلا وكلهن سلموا اوراقهن فاضية وكانوا كتير مضطربين. في أربعة أسئلة عليهن من أصل مية علامة  تماني وأربعين، والسؤال الخامس لوحدو عليه من المية اتنين وخمسين. السؤال الخامس كان عن أي دولاب من دواليب السيارة الأربعة فرقع معكن وبنشر وإنتو مشرًفين

كان الإستاذ بالعلامة أكرمهن لو كانوا صادقين. بس حبل الكذب قصير يا جماعة، وبسبب الكذب صاروا بالمادة ساقطين. اي مع هيك إستاذ داهية، على مين بدهن يضحكوا؟ على مين؟