قصتنا مع الفايسبوك- الجزء التاني

الفايسبوك ببلاش .. ليش حتى ما تشترك فيه ليش. غسل إجريك وفوت .. إن كنت دكر أو كنتي بنوت .. اختاروا شي صورة من صوركن للبروفيل .. من يللي عاملين إلهن بالفوتوشوب تجميل

بالأول فتش يا شاب عالحبة النضيفة .. وزيد عندك كم بنت ظريفة. وإن كنتي بنت بنوت أو مزوجة .. تقـلي حالك ومن بعيد لبعيد عالشباب تفرجي. اختاري بالأول من بنات جنسك، وانتبهي باختيارك ... حتى ما شي وحدة بتحب النسوان تطلعلك يا شحارك .. هيدا إذا ما كان رجال وعامل حالو مرا ..على طول أعطي بالك وهلم جرا

الوقت ما بيطوﱠل والبريد عندك بوقت قصير رح يفوﱠل. تلاتة من لبنان .. من بيروت المتن وكسروان .. اتنين من البحرين .. وواحد من طالبان .. واحد أبيضاني من السودان من أم درمان .. شي من السند وشي من الهند .. وتنين من مصر .. واحد من مدينة نصر .. وواحد من مرسى مطروح .. لوين ما بتاخديه بيروح. وواحد كويتي جاهز ليتزوجك على السكيتي .. وزيادة عنهن شي عشرة .. من مختلف بلدان العالم المتشرة

إن كنتي حلوة قمورة .. عيونك خضر وفرفورة .. وشكلك متل السنيورة .. لما تقري هالرسائل .. رح يصير لون وجك بلون البندورة

واحد يقلك: ما أحلاكي يا قمر.. لما شفتك قلبي انفطر.. رح سهرك ليلة من العمر .. وبدفعلك بالسترليني والدولار. هيدا رقمي أنا ناطر إتصالك على أحر من الجمر .. اي البلي تسترك ستر

والتاني يقلك : أنا من صورتك حبـيتك .. واندوخت عبال ما لقيتـك .. أنا طالع على بالي .. إتعرف على صاحبة الجلالة. شو بدك بالفايسبوك .. نحنا صنف شباب نيو فرجن مدعوك. زيديني عالماسنجر زيديني .. يللا استعجلي وإيمايلك اعطيني .. اي ريتو بوزك ينسد بفلينة .. متل ما بتـتسكر القنينة

والتالت يقلك: اعتبريني متل أخوكي .. من إمك وأبوكي .. شفت أنا شو كتبولك على الوول إنتبهي من الزعران لا يأذوكي. اي هيدا زلمي خرج تـتعرفي عليه .. هيأتو نضيف وشريف ونيتو صافية ولطيف. بتـقوليلو، ميرسي كتير خيي شريف .. شفت كلامهن شو سخيف .. يا دللي أنا .. شفت شو في شباب عـقلهن خفيف

بيقوم بيقلك: شفت يا أختي يا حبيـبتي يا قشطة .. في كتير شباب زعران ما بينعطوا وج يا قطة. عم يضحكوا عليكي يا بطة .. ما رح خليـلك فيهن ستر مغطى. هول لما شافو عيونك يللي بتغزل غزل .. وجسمك يللي بيهبل هبل .. وشفافـك يللي بينـقـطوا عسل .. افتكروكي آخدي حبوب منع الحمل .. ودايرة تلمي مصاري بالهبل. يبعتلك حمى مالطية إنت التاني، ولك رح تيـجيني من وراكن جلطة .. أو تجيني بنص راسي النقطة

ولك شو صاير لبعض الشباب، بيضل ريقهن عم بيـشط، متل القط بشهر شباط من بسينة لبسينة بدو ينط. حسن أخلاقك يا شب، مش هيك البنت بتنحب

ويوم عن يوم بيصير الوضع محمول .. وكل يوم رح تلاقي شي مية على الليستة طالبين الدخول. بتختاري الحلوين وبتـلبطي بإجرك الباقيـين. وأكيد بالغلط رح يبقى يطلعك كم صقيل وكم مسطول .. إيدك والديليت وعمليلهن بلوك على طول. ورح يجيكي ورود كتير ..  وهدايا عطور وتياب وسوفنير .. باعتهن زوزو ونوزو وكوانّوزو ومنير. اعملي "رجكت اول" .. لا تضيعي وقتك مع هادول .. ولا تتعبي راسك وتقضيها سف بنادول 

وأوعي تطلعي شاتينغ اونلاين، الشاتنغ تعتير .. كأنك صفرتيلهن تصفير. هيدا كيفك وهيدا وينك وهيدا الأهبل رح يقـلك أنا بشير. وإذا لا بد وظهرتي .. وصبحتي كم واحد ومسَّيتي .. وما عدتي عالكل لحقتي .. اعملي حالك أنو ييه انقطعت الكونكشن .. وانكتمي ما تعودي تعملي أيا أكشن، لأنو بيتابعوكي على الفيد .. قولولي ومنكم نستفيد

ويمكن بعد كم شهر بتـتـفتح عينك على أمور كتير. بتعملي غروب بإسمك حتى يصير إسمك شهير .. وبتسوّقي أغانيكي ولو كان صوتك تعتير .. أو أشعار لإبن المقفع على إسمك "كوبي بايست" بتحطيهن تزوير. وبتصيري تقبلي الكل كفراندز، الكبير والصغير .. والمقمت بالسرير .. وبيصير عندك أصحاب من ميونيخ وسربرنيتشا وبوروندي وإزمير. على العمياني بتـقبلي المصرصع والمنحط .. المزلطة والمنطنطة .. واللي بدل صورتها من صور المشاهير حاطة. وبتتواصلي مع الفراندز بالقطارة وتصيري تحكيهن من روس المناخير

وإنت يا شب يا أمير.. إن كنت من عامة الشعب، أو مرشح للنيابة أو كنت وزير، بعد ما تكون لقطت شي حبة نضيفة، اطلب صداقة شي كمشة من فراندزاتها يللي اشكالهن لطيفة، وجرب حظك إلا ما تنقش. وحسن ألفاظك وأوعى تقـلها ريتو يقبش

قلها صباح الخير أنا بشير .. مهندس كمبيوتر وهوايتي التصوير.. بتمنى نكون أصدقاء .. ونهارك سعيد وقحط ما تكون قاق .. لا تلزق عليها متل البزاق .. وكل ما تطلع اونلاين تنطلها باسم الصداقة والأصدقاء. خليها تتـنفس شوي الصعداء .. أو بتصير كل ما شافت إسمك نبق اونلاين تنقطع عندها الكونكشن .. كلامي هيدا حقيقة مش "ساينس فيكشن". ابعتلا وردة كل اسبوع .. مش وردة كل يوم؟ نونونو ممنوع .. وخود العبرة من اللي كتبتو فوق، خلي عندك شوية ذوق

خلص المقال .. يللا بقا ..روحوا اقروا شي مقال تاني، أو بقلكن؟ روحوا أقروا الجزء الأولاني ...رح تلاقوه
بهاللينك هوني