نواب لبنان والوزرا...شو دخلهن بخطبتي يا ترى

يا فؤادي عليها ما احلاها متل السنيورة..... كل ما شوفها بحس قلبي فتفت وبسرح باحلامي وبتخيلها معي بعرض البحر وراكبين بشختورة. أو بتخيل حالي فارس على حصان وراكبي ورايي هالقمورة. شعرها الاشقر الحريري بيطوش طوش، شو بهية طلتها، ريتها تقبشني قبش. متل غصن البان بالطول بتشطحني شطح، وبحبها انا رحت سطيح، اي بطحتني بطح. من كتر جمالها الجراح قلبي من الوجع جعلك، ما تقولولي ما تجيب سيرة الحكيم نحنا ما منسمحلك

من بعد عدوان حرب تموز، وعودة المي لمجاريها، ومن بعد ما رجع للبلد الوئام وهاب العدو قوتنا ودوقناه من الحرب مآسيها، قررت اخطبها حتى الفرحات تعم،هي تفرح فيي وأنا أفرح فيها

قلتلها لامي، ابنك هالشاب الحلو عبالو يخطب، وايد عروس بتسوى تقلا دهب ناوي يطلب.
قالتلي شو رأيك ببنت أبو جمرة حميدة، وأبوها عندو مخازن وسوبرماركت من نوعها فريدة، ورح يشتري قصر فرعون ومن التويني ناوي يشتري الجريدة

قلتلها يا أمي، على عروس لا تحوري ولا تدوري.... عيني على بنت جارنا الحاج حسن، اخترتها هي بالذات ميشال تكون الي عون بالحياة وتشد من أزري للممات. حابب اتزوج واستقر.... وتشوفيلي خليفة تفرحي فيها وعينك تقر. قالتلي يا ابني انت ابوك نصر، الصايغ المعروف، بدك تناسب بنت سكافي وضعو منتوف. قلتلها يا امي ما تقولي هيك... ابي نصر، من نعمة الله علينا انو صار غني، شو نسيتي لما أخدك، شو كانت قاسية عليكن الدني، كان بشبابو مكاري وعمي ابراهيم كان نجار، ولو ما فضل الله علينا لا صار ابي جوهرجي ولا عمي مدير محطة دير عمار

اذا الي كرامي عندك، طاوعيني... جارنا زلمي صالح و فاضل وبنتو متعلمة وخلوقة المسكينة. صحيح بتلدغ بري، بس كتير نبيهة.... حكيها قليل وبكرا شوفي شو رح تنبسطي فيها....أنا كنعان فيها كل الاقتناع، خلص يا امي طريها. ما احسن ما آخد واحدة ما دايرلها الا الطقش والفقش، ولسانها سليط ما بتحكي الا لطش. أو ابتلى بواحدة خريجة مخفر حبيش، واندب حظي ندامة ويطلع حظي فوفاش، أو تطلعلي واحدة تدوقني زوم المر...وتضيعلي زهرة شبابي من كتر ما بتنق وبتقر.

قالتلي يا علوش يا حبيب قلبي تروى شوي، هيدي جازة يا ابني مش لعبة لا تكون ني، مش دق طاولة هيي محبوسة او فرنجية ولا هي شربة مي. قلتلها يا ماما، انا زلمي بعدني كافي النسوان شري وما عدت ولد صغير....اذا بدك ياني سعيد، خلينا نخطبها قبل ما من ايدي تطير. بعد شوي رح ختير وضهري يحني متل الاحدب صير، وينطفي مصباح عمري وتصير صحتي تعتير. بدونها انا رح فنيش وعلى خطبتها ما ناوي طنش

قالتلي تكرم عينك ولو مش من قلبي .... جبران خاطرك عندي مهم ما رح آخد موقف سلبي. هيي قالتلي هيك وطار فؤادي من السعد، لو كان عندي بارودي لقوص من الفرح أو أضربلي بالفضا شي صاروخ رعد. قلتها أمين وعظيم يا امي، الجميل هيدا ما رح انسالك اياه.

صار النصيب وخطبنا هالجارة وقدمنا علامة طوق من الالماس والحجار الكريمة واسوارة، وصرت آخد بأيدي جاط حلو أو سندويشات من عند الصفدي كل ما روح لعند اهلها زيارة. خجولة زيادة وبأمرها احترت، قلت بركي حد اهلها بتستحي تحكي رح اعزمها عالغدا أنا هيك قررت

على حسب خليل صاحبي ما قللي، عند قلعة موسى في مطعم بوج الجسر تمام، أكلو نضيف وعندو مطل عالوادي ومناظر يا سلام.

رحنا عالمطعم تاني يوم، واستقبلنا هونيك شوغرسون. شكلو من التراث بزي البستاني متنكر.... واقف متل السبع، ناطر شي زبون محضر حالو ومستنفر

يا هلا بعريس الزين وشرفتي يا عروس نورتي المكان. رح ادبح على شرفكن ابو ساعور صغير ونزلكن فورا مقبلات وفتوش وتبولة وطبق من الداوود باشا، البيك مقامو كبير. مي معدنية وكازوز ... بيبسي وجلول تمرهندي تشربوها على انغام غنوة لكيروز.. عفوا لفيروز

وراح الغرسون طارق سفرة شي مترين بمتر، سكتت أنا قلت بركي عالأكل بيفتح معها السكر. كعيت وانا واعرض عليها من الاصناف، وهي تقول لأ بهز الكتاف، والغرسون واقف على جنب لاطي، عم يتفرج علينا بحجة انو اذا طلبت شي، يلبي طلباتي. يعني بالنهاية ما أكلت الا كوساية ومن الفواكة أكلت موزايا . شو كان عبالي ناولها بالسكرية.... اي من كتر ما عصبت ما عاد فيي.

بالرجعة من المشوار، ما عرفت كيف وصلتها عازاروب بيتها. صرفت عليها بلا طعمة ما عارف انا شو ضرب على قلبي ونقيتها.

قلتلها معك حق يا امي، يا ريتني منك سمعت الكلمة، لحودي لأهلها من الصبح خبر، عن زواج بنتكن نحنا صرفنا نظر. لا حردان يا امي ولا زعلان ورح قضيها شم هوا... بس شماتة اصحابي أسامة و سعد فيي ما رح فيني اهضمها، الله معوضني عن العروس بحنانك، ضحيتي منشاني، الله يكبر شانك

قالتلي على طول انت جابر خاطري، الله يجبر خاطرك. نوسة ونوسة عليي، بدر البدور بدي اخطبلك

خلص بقا روحو، خلصت الخبرية، قصة وكان بدنا نقولا تا نسليكن عالصبحية، ورح ابقا عم ألف قصص، تا تبقو تطلو عليي


نواب لبنان ، الوزراء والسياسيين حسب الظهور

فؤاد السنيورة - أحمد فتفت - عصام فارس - مسعود الأشقر - بهية الحريري فايز غصن - محمد شطح - جمال الجراح - سمير جعجع - وئام وهاب - عبد الله فرحات - جورج عدوان - بطرس حرب - باسم الشاب - عصام ابو جمرة - أيوب حميد - فريد الخازن - غسان التويني - عمار حوري - ميشال عون - محمد جواد خليفة - فيصل الصايغ - ايلي سكاف - نعمة الله ابي نصر- فريد مكاري - ابراهيم نجار - حسن فضل الله - علي عمار - عبد المجيد صالح - موريس فاضل - نبيه بري - جمال الطقش - انطوان زهرة - ابراهيم كنعان - هادي حبيش - ميشال المر- مصطفى علوش- فريد حبيب - علاء الدين ترو - سليمان فرنجية - أمين شري - فارس سعيد - مصباح الأحدب - علي فنيش - جبران باسيل - فؤاد السعد - زياد بارود - محمد رعد - أمين الجميل - جبران طوق - محمد الحجار - بيار حلو - محمد الصفدي - كميل زيادة - علي حسن خليل - ميشال موسى - سمير الجسر - تمام سلام - الياس حنا - علي بزي - ناجي البستاني - باسم السبع - عبد اللطيف الزين - نقولا فتوش - فيصل الداوود - غنوة جلول - حبيب كيروز - نادر سكر - وليد جنبلاط - شامل موزايا - اسماعيل سكرية - سمير عازار- نعمة طعمة - نسيب لحود - اسعد حردان - عباس هاشم - اسامة سعد - نايلة معوض - ياسين جابر - بدر ونوس - نبيل نقولا