تعودنا على الزبالة
عيشتنا بالة .. تعودنا عالزبالة .. عم نرعى
بأحضانها .. والأمراض جوالة .. مكملين للحضيض .. أكيد مش للعلالي .. مقضينها برّ .. وتركيب مقالي
.. أركيلة وواتساب ... وتزنيخ وصقالة
في شلة فاسدة .. من أصحاب المعالي .. عالبلد عالة .. يـبقوا
قالة .. خربولنا الإقتصاد .. جابولنا البطالة .. وسياسة البلع .. بالعلن شغالة .. وين حس المسؤولية
.. هول بدن إقالة. وصلوا من خلالي .. خطفوني مع خيالي .. قطّعوا أوصالي ..
وعـطّـلوا أشغالي .. هدروا مالي .. نوصولي ضوي .. الواطي والعالي .. لوثوا البلد .. ولِيّ على هالحالة
زعامات متنافسة .. عالوعي كابسة .. آسرة هالناس .. وأنفاسهن حابسة
ختيار مكحكح .. طبعو
افتراسي .. من برا لولو .. ومن جوا نحاسة .. وآخدلي النيابة .. برستيج ووراسة .. وعليي
معنطز .. وبيقبض من اكياسي
شعب غافي .. وناسي التعاسة .. ملهي
بالسياسة .. وبكرسي الرئاسة. الظاهر الكراسي .. بتـنسّي المآسي .. وبتخدّر الناس
.. بوقت قياسي
اللبناني بالذات
.. بالسياسة انغماسي .. على مصالحو الخاصة .. بيتقاتل بشراسة .. ولمصلحة البلد .. ما
عندو حماسة .. فايت ببعضو .. ومضيع الطاسة
ولك أنا بالسياسة ..
مقبع ضراسي .. وما راح سمعكن .. حكي دبلوماسي. طالما زعيمي .. سندي ومتراسي .. وبنظري
نزيه .. ومن غيرو الخساسة .. رح يبقى البلد .. عم يعاني ويقاسي. إن حِلف خماسي .. أو حتى سداسي .. رح يطرقوا الجبنة .. وحا تطلع براسي .. ما الطقم ذاتو .. ومقاسو من مقاسي
.. ما أنا اللي جبتو .. وركبتو على قياسي
عم فتش على شغلة
.. بهالوضع القاسي .. على بواب الشركات .. عم إتكنس كناسة .. والوظيفة من نصيب .. إم
بشرة حساسة .. يللي تنورتها طلوع .. وجسمها مياسي .. وخود على خبريات .. يا شيبك يا راسي
يا حسرتي على .. سنين الدراسة .. هندسة وعلوم .. تا اتقـطَّعت أنفاسي .. فنون وجنون .. مع أدب وكياسة .. كرّسولنا التخلف .. بزمن الحداسة
أنا عن قريب .. رح إعلن افلاسي .. العيشة مرة .. طفحت الكاسة .. هاجج من البلد .. بلا أهلي وناسي .. وإنتو
خليكن .. على جراب الساسة .. ادبكوها كرمالن .. اعملولهن حراسة .. غطوا أفعالهن ..
تعاموا عن الدناسة .. ليورتوا ولادن .. السلطة والكراسي .. بكل سهولة .. ويسر وسلاسة
posted by غسان جوهر @ Wednesday, December 09, 2015
0 Comments
0 Comments:
Post a Comment
Subscribe to Post Comments [Atom]
<< Home