حـنـيـن

 

رجعت يا بيروت وباقي حدك

 تا إطبع البَوسات على ورد خدَّك

ومن قلب صافي متل السلسبيل

 دقات قلبي على قلبك تميل

 حبَّيناكي من يوم الكنَّا صغار

 وبعدنا منحبك رغم الأسى والنار

بالغربة سيرتك ضوِّت الغياب

 يا قمر مضوي بياخد الألباب

غبنا عنك بس القلب بيحنّ

   طال الغياب ونار الشوق تجنّ

بيروت رجعت وباقي معك

  بيروت حكيني أنا عم إسمعك

بيروت لا تزعلي مني

 أنا منك وإنتي مني

بيروت ضلي اضحكي

 بيروت لا تبكي لا تشتكي

 معك طول العمر باقي

بعرف زعلتي عا فراقي

جيت وجايبلك شوق وحنين

ما نسيتك كل هالأيام والسنين

ضمِّيني حطِّيني بدفا قلبك

اغمريني واسقيني صفا حبِّك

بيروت يلي غرامي فيكي شاب

بعدي عنك كان إلو أسباب

ما كنا بيوم عن بعضنا غراب

خلينا نرجع متل ما كنا صحاب

عاتبيني الحب بيصلّحو العتاب

خلِّيني عيش معك يومين مهنَّى

والقمر ونجوم السما يسهروا معنا

بكرا منموت

وإنتي بتبقي يا بيروت