ميكانيسيان لقطة

كنت مأخر ع شغلي ... وركبت السيارة دغري ... دورتها بهالمفتاح ... ودعست عالبنزين بإجري

يخرب بيتها هالسيارة تنحرت، لا فشخة مشيت ولا نص متر تقدمت، وقفت بأرضها ودبرَسِت. دلوني على ميكانيسيان عندو ونش خصوصي، ونصحوني فيه على أساس إنو بهالنوع من السيارات إختصاصي. ما في عشر دقايق إلا واجت النجدة وحضر الونش... وطبيب السيارات شرف ونزل من سيارة جيمس. قرب صوبي ووقف قبالي، ومن فرحتي فيه إني بوسو كان عبالي. بالأول إفتكرتو حكيم. لابس روب أبيض متل الفل ... وعوينات هالسمك مدندل من رقبتو وعلى سنين خبرتو بيدل. قلتلو دخيلك ما بعرف شو صار ... لا بفهم بالميكانيك وقلبي عالسيارة متل النار. قللي ما يكلك فكر ... بكرا طل لعندي عالكراج بعد الضهر ... وما تاخدها مني إلا ومشيتها متل النمر. تاني يوم مرقت ... وقللي هلق حتى منها خلصت

قللي بس شو بدي خبرك حتى خبرك، ولك من قطوع كبير زمطت. كيف كنت ماشي فيها للسيارة ... منيح ما قطعتك بالجبل وطلعت معك الحرارة أو خبصت شي زلمي وشدوك عالنظارة

قلتلو رعبتني شو في؟ قللي عم تسألني شو في؟ بسيارتك شي صاغ ما لقيت في
 
أول شي ... في عندك بيضات التراكوح كانو مبريـين، يعني على شوي كنت كوعت شمال والسيارة راحت يمين. يعني لو طلعت فيها عالجبل وتهورت كنت إنت وياها بالوادي تدهورت. وكمان عندك موازيح السيارة كانوا دايـبـين عالآخر... يعني على شوي كان راحوا معك الفحاويط ويا ساتر

قلتلو ما تعتب علي يا خيي، بالميكانيك بغرق بشبر مية، شو هني الفحاويط  طول بالك عليي شوي

قللي كمان ما بتعرف شو الفحاويط ؟ هول يللي بيتحكموا بالبطيخة تبعت الدَّعكور، يعني بتجي حتى تلحًس فرام، ما بيلقًط معك، ولك ليش هاملها للسيارة هالقد يا زلمي ؟ قلتلو ما بعمرها عطست معي .. حتى الدعكور بعمري إسمو ما مارق على سمَعي

قللي ليش هي وقفت بس على هيك. في عندك السكَملَة تبعت الدركسيون كانت مفندقة كتير، يعني على شوي كان انحلوا العزاقير وطلع الكيدون بإيدك. هيدا غير السكملة يللي خدمت جنديتها، يعني على شوي كان ضربت بالتمرز وكربجوا معك الطعاويج، قول منيح يللي لقيتلك منهن بالبالة ... قصدي بالكسر، هولي ما عاد إجا منهن

وفي عندك الحبسات تبعول الشالوف كانوا معك فاتلين، يعني على شوي كان تعطل الدفًاش تبع الترَيمسة وكان ولع الموتور، بس ولا يهمك لحقـناهن على آخر لحظة

وبعدين منيح يللي انتبهت على السمَيسْكة، عرفتها؟ ما تقللي ما عرفتها؟... هيدي يللي بتكون على يمين الموتور بين الدبقة وغطا الدعَـيـبسة ، يعني حد الدلاعة لزق، اي هيدي سيدنا كانت مبرية وعم يتسرب منها زيت السفلكوح، يعني على شوي، كان احترق الفيتاس وكانت لبصت السيارة بأرضها وكربجت ، بس أنا شو عملت حتى وفر عليك، قرصت المرمورة وشديت عزقات الدفاش حتى وقف النش، بدل ما نضطر نغير الدّعَـيبْسة كلها

قلتلو دخيلك منيح اللي جيت لعندك، لو ما جارنا أبو سعيد كشاتبيني دلني عليك يمكن كنت روحت حدا بالسيارة دعس ... أو رحت أنا وياها بشي مهوار معس. دخيلك خبرني بعد في شي؟

قللي ليك ما بخفي عليك، كانوا لاطشين معك تمرات الكوندكتور، وبدونهم مضخة البنزين كانت فرطت وعملتلك حريقة، بس أنا حليتلك الموضوع وغيرتلك كل التمرات مع نباريجهن. بعدين وينك؟ انت شو عامل بالطقطوق؟ انت ما عم تعمل ريفيزيون للدريناتور كل أول صيف؟

قلتلو بصراحة لأ.... كنت هاملها للسيارة وما جايبلها عدة حتى ولا مفتاح شق ... ولك خللينا ساكتين، صاير ما عم ركز  من كتر النق ... والمعاش كلو رايح على طلبات مرتي، ما بيهنالها تلبس وتتزين إلا على سنجي طق

قللي اي لعلمك كمان، نحنا لحقـنا الحرديناتورعلى آخر لحظة، كان ضغط المي كلو محشور بالطقطوق، يعني لو لحق وطق، كان العوض بسلامتك وكانت سيارتك موتورها قلبو بق

يعني نهايتو ... تصلحت السيارة والميكانيسيان شكرتو... على براعتو دقتو وأمانتو. صحيح كلفتني كتير ... بس بيبقى أهون من يللي كان ممكن يصير. وما يسلِّم الواحد إلا لبروفيسور سيارتو .. وما يسترخص ويصلحها وين ما كان حتى ما يندم ومن القهر تطق مرارتو

قولو مرقلو شي أسبوع زمان .... وصادفت إنو كمان

كنت مأخر ع شغلي ... وركبت السيارة دغري ... ودورتها بهالمفتاح ودعست بنزين بإجري

يخرب بيتها هالسيارة تنحرت، لا فشخة مشيت ولا نص متر تقدمت ... احترت بأمري ... وعن دعسة البنزين شلت إجري . مدري كيف انتبهت، إني كنت عم قلع بالسيارة ... وبعدو فرام الأيد مشدودعلى آخر بارة. أتاري سيارتي ما كان إشبها شي ولا كان فيها عطل ... وكل الموضوع إنو أنا طلعت غشيم وسطل. انغشيت بهالمكانيسيان المحتال اللئيم... يللي عامل حالو بطب السيارات بروفيسور وحكيم ... خدعني بشكلو وهندامو كتير ... وبالكلام المعسول إنضحك عليي عالأخير

يا عمي ما تنغرو بالمظاهر الخداعة .. ما تتركوا الجوهرالمخبا وتلحقولي تنكة لماعة ... تحصنوا بالعلم وبالقناعة ... ولا توقعوا بالمصيدة هون البراعة

 شو؟ .... بعطيكن عنوان الميكانيسيان؟ هههه ... قال الطـقطوق قال