هاهاها ...صدر القـــــرار الظــــــــني

صدرِ القرار الظنّي .. يللا نرقص ونغنّي .. ونعملّو طنّة ورنّة .. نمرِّك عَجَارة وكنّة .. يزرّك للشيعي السنّي .. والقواتي المتهني .. ينمِّر على العوني .. وجنّي يا بلادي جني

مين على ضهري دبّني .. من ست سنين وكبّني .. عا ملا وجّي طبّني .. شتمني أنا وسبّني .. شفق عليي ولمّني .. على قد ما صار يحبني

أنا ما رح أركض هنّي .. على الإخراج الفني .. الأمريكي اللي فـتنّي .. عندو إنت بزيــــت .. وأنا عندو بسمنة .. والشرّ عمّك وعمّني .. بذمّك أنا وبتذمّني .. بحفرلك حتى طمّك .. وإنت بدك تسمّني .. بدل ما أنا ضمّك .. وتركض إنت لتضمّني

وحَربِك علينا شنََي .. يا بنتا بالتـبني .. وعلى لبنان تجَنّي .. بإسم القرار الظني .. منعرف شو بتـتمني .. ولك حلّي عنو وعني

حاجي بأيدك تنكزني .. وعلى خيي توزّني .. وتقول إنك بتعزّني .. لمصلحتك تحجزني .. إنت بتستفزو وهو بيجي ليجزّني

عَطَبَك وعَطبني .. هالوضع إل ما عاجبني .. كاويني ومغلبني .. فارمني ومدوّبني .. ما خـلّوا قطعة جبنة .. ولا حتى لحسة لبنة

صدر القرار الظني .. يللا نرقص ونغني .. ونعملو طنة ورنة .. نمرِّك عَجارة وكنّة .. يزرّك للشيعي السنّي .. والقواتي المتهني .. ينمِّر على العوني .. وجنّي يا بلادي جني

سؤال على الهامش : هلق بالقانون، البرئ متهم حتى تثبت إدانتو أو متهم حتى تثبت براءتو. واللا المتهم برئ حتى تثبت إدانتو، أو مدان حتى تثبت براءتو. ضيعونا يا عمي إنتو ضعتو واللا بس أنا اللي ضيعت؟؟؟؟

ملاحظة : أعيدوا القراءة على نغمة "يا ولاد أبو شرشوبة... يويو"... ههه..عرفتوها؟... تبعة المراجيح