قصتنا على الفايسبوك _ الجزء الثالث

شو هيدا هالفايسبوك .. أهلاتو من تيابك بيطلعوك .. ووقتك التمين بيشلحوك.عاداتهن غريبة عجيبة بتناقضاتهن بيدوًخوك .. بلسانهن يللي بينقط عسل بيـبلفوك .. على هونولولو بيسفروك .. وعلى بيتك عطشان مطقطق بيرجعوك .. بـأفعالهن اللي ضد أقوالهن بيضيعوك. إذا غبت فترة بينسوك .. وإذا طار بروفيلك بالديليت بيتهموك .. وإذا زدت فراند من عندهن بيبعتولك شيلو من عندك هيدا إلي أرجوك

ياي شو في أصحاب بيحبوك .. بالهدايا والورد بيطموك .. ولما تطلب خدمة من قريبو بيسفَهوك .. أو للتـمويه خير بيوعدوك .. وعالوعد يا كمون عالفاضي بينطًروك. وفي أصحاب وصوليين لمصلحة بيسايروك .. وإذا ما عاد إلهن مصلحة معك بيزبلوك .. عـايـزينك بيشتروك .. وإذا خالص كازك بقشرة بصلة بيـبيعوك. وفي أصدقاء بيعشقوك ... بغروباتهن بالقوة تعباية بيعبوك .. وعضو رابطة فنونهن غصبِ عنك بيسمًوك .. بالبوست على مدار الساعة بيهروك. في منهن يغزي العين شو موهوبين، بشعرهن ونثرهن من تقلو بيعَوروك .. ويللي تعلمتو بالمدارس والجامعات بينسوك .. وكل كم يوم على بيعة كتاب محشي تفاهات بيعزموك

في ناس عالانترنت بيـسَطٌلوك .. بس يشوفو صفحة لفـنانة أو نايب بيهرولوا متل الديوك .. يطلبوا الإضافة وفواج فواج بيـيجوك. تقبر إمك لا تشوف حالك يا فنان هولي نصهن ما بيـحضروك .. لا هني من رأيك السياسي  يا نايب ويمكن حتى ما بيـطيقوك .. بدهن إياك منظر بس على ليستة الفراندز حتى نفكركن كتير صحبة وإنهن بيعرفوك

يا فايسبوكًي ما تكون طميع وتحاول من الفنانين ويللي بنظرك مـهمين تتقرب، طمن بالك ما تطق ما رح يـلكشوك .. لا إذا صبًحتهن أو مسًيتهن رح يجاوبوك .. وحاجي تبـيض وج وشو ما قالوا سخافات تكبًس لايك، إنو بركي من اللايك بيصيرو يحفظوك .. ما تعذب حالك هني لا معبًرينك لا إنتي ولا اللي خلًفوك .. انتي بنظرهن رصيد حتى يشوفوا كيف بدهن يستغلوك. هو في منهم ما بيـبَوبوك .. مش شوفة حال بس ما عندهن وقت يحاوروك .. هدفهن على برامجهن وأخبارهن يـطلعوك .. أو إذا عندهن شي مسرحية عليها يعزموك

في أصدقاء مناطرة بيـنطروك .. شو قلت وشو حكيت عالدعسة بيـتابعوك .. لما يكونوا زهـقانين على راسهن بيحطوك. بس أحيانا بيـفاجأوك ... وشو ما قلت وكتبت ما بيـعودوا يشوفوك .. وبتـفكرهن غاطسين بشي برنامج تلفزيوني أو خبر عاجل عن إنفجار سبًب ضحايا ودم مسفوك .. وبتصير تـقلق وتبَرم بين هـالمحطات متل المكًوك. يا عمي ما ترتعب ما في شي، بس الشبيـبة بالشات ملهييـن وبوقت الشات طبيعي على جنب يحطوك

وفي ناس على بروفيلك بالوج مراية وبيـأيدوك .. وبالقـفــا صرماية ومن تحت لتحت بيـحاربوك .. بيتـجسسوا عليك ومن الحقد والغيرة بيـتآمروا حتى يأذوك .. وبيـتعاونوا مع زلامهن حتى يشكوك .. بركي إدارة الفايسبوك لـبرًا متل الدجاجة بيكشًوك .. وبيـسكرولك بروفيلك وبيطردوك. اي ريتهن القرود ينتعوك .. وعن الأذى يا حقود يمنعوك. بالنهاية رح تنكشف للكل أديش أنتي صغير وتصير متل القملة مفروك

لــه يا إبن الفايسبوك .. ولك تصرف متل الملوك .. بيكفًي تمسيح جوخ ومظاهر،كبرلي عقلك وحسًنلي هالسلوك .. لا تجبلنا من محيطك على صفحاتنا حقدك السياسي، أوعى يا خيي شي يوم بيبرم الدولاب وبيلقطوك .. لا تشد وتقد تقلي فشر وتسمًعلي شعارات، وقت الجد من أول كف حا تقرعن يلي على خيك حقنوك

يا حبّوب، نصيحة لا تنام وتقوم على الفايسبوك. هيدا المكان نسخة عن المجتمع وغير هيك ما يوَهموك .. تلميذ تاركلي درسك، عزّابي وهامللي نفسك، بست فراند وأحلى فراند ما رح ينفعوك. مجوَز التفت لمـرتك، أب انتبه لأبنك وبنتك، أديش صرلك ما شايف فايس أبوك .. جارك الباب بالباب ولك عميل حساب للناس اللي جاوروك

أنا خلصت كلامي، يللا إكبسلي لايك بس أووووعا ...... أوعا تكبسها إلا إذا كلماتي عجبوك