خدم آخر زمن

سامعين بكيد الكناين والحموات؟ أكيد .. طيب سامعين بمكايد الصناع والخادمات ؟ مش عارفين شو يمكن يطلع منهن قصص وروايات؟ وأذى وقلة حيا ورذالات؟ مش انتو يللي بتجيــبوهن لعندكن ع نص البيت؟ قال جابو خادمة نضيفة .. لهلوبة بشـغلها وآدمية وعفيـفة .. وفرحت فيها ست البـيت يللي إسمها ظريفة

من الستة الصبح بتـبلش تنـضيف غسيل وشطف .. وظريفة وجوزها غرقـانين بالنوم ومغطايـين باللحف .. حتى إذا فاتت الخادمة عالأوضة فجأة، ما يكون في على عوراتهن كشف

ومع الأيام، تعودت عليهن وتعـودوا عليها .. حتى صاروا ما ياكلوا إلا من طبخ إيديها. بس هيدي الخادمة سوما أخدت وج وكترت .. وصارت كأنها هي ست البيت وتغـيرت طباعها وتبـدلت. يا بعدي صارت بتـعطر وبتـتبـودر .. وبالبيت بـتـترقوص وبـتـتـغندر، حتى شكّت الست ظريفة بأمرها وصارت تراقبها كأنو سوما الكنة وهي مرت عمها

مرقت الأيام وما قدرت ظريفة تعرف السر .. وتعبت من المراقبة وهالخادمة دوقت معلمتها زوم المر. اي ما عادت تشـتغل بالبيت إلا دفـش .. وصارت تتـابع كل مسلسل تركي ومكسيكي وتبرش محطات التـلفزة برش. حالتها ما عادت تـنطاق .. وكل ما شكـيتها لزوجها شكيب يهـديها ويقـلها عامليها بسياسة مش بخـناق. إذا رجًعنـاها على المكتب بتـاكل قتـلة وبتتـلحوس .. وإذا ردّينـاها لعند زوجها بـيضربها بيـهينها وبتتـدعوس. طولي بالك عليها معليش .. عندها ولدين ببلادها ومن معاشها بتعيـّشهن وبتعـتاش

الست ظريفة وجوزها كل يوم بيروحوا مع بعض عالشغل .. بيـوصلها الصبح بطريقو والمسا بترجع معو بدل البهدلة بوسايل النقل. وفي مرة حست ظريفة بارهاق وتعب خلال الدوام .. وطلبت إذن من المدير تا ترجع على بيتها تاخد حبتين بانادول وتنام

وصلت على بيـتها وفتحت الباب .. ونادت سوما بس ما لقيت جواب .. راحت ظريفة على غرفة نومها وبالكـوريدور كانت مرشقة على الأرض قـطع تياب .. وروايح العطر معفـقة وفايحة .. وصار قـلبها يخفـق من الخوف وحست حالها دايخة. قربت من غرفة نومها عالمعس .. وصارت تسمع شوية كلام وهمس. يـبعتـلك حمى يا سوما .. وبغرفة نومي هالواطية مش بغرفة نـوْما .. الظاهر ملفًـاية لعندنا صاحبها .. بغـيابي عن البيت وغـيبة معلمها

لحظة .. لحظة .. شو هيدي هابيبي مستر .. الله يجيرنا من ساعة الغفلة، الله يستر. تطلًعت ظريفة من شق الباب بطرف عينها .. وعالصدمة سكوا ركابها وما عادو حملوها إجريها. هيـدا شكيب بشحمو ولحمو .. وسوما الشوكولا مو سايحة ونايحة على جسمو .. ظريفة من المشهد نشف دمها وكانت رح توقع بأرضها وتنهار .. إرتبط لسانها وقلبها يصرخ يا مغيث ويا ستار. تراجعت ظريفة لورا خطوة وخطوة عاللس .. وقـلبها مولع ونارها عم تعسً عسً. ومتل ما فاتت على البيت .. رجعت ضهرت عالسكيت

على أقرب قهوة فاتت وطلبت مي .. كرعت القـنيـنة كلها وقعدت ترتاح شوي. وصارت المسكينة تحاكي حالها .. وكيف بعد هالسنين بيخونها رجـّالها. يـبـعتلك الحمى الشهاقة يا شكيب شوغـدار .. بتـنام معي بالليل وبتـخونني معها بالنهار؟ يبـعتلك حمى مالطية يا مقـطع يا موصّل .. ويجـيبـولي اياك مجـلوط وعلى الكتاف محمل

وبلـشت تجـيـبها وتاخدها الأفكار .. وقررت ترد الصاع صاعين لهالأوغـاد الأشرار .. وبالأخص جوزها يللي عامل حالو متل البسين .. وهو من تحت لتحت عم يلدغ متل التعبان. إنو سوما .. الأمور معها محسومة .. عـلقة سخـنة بالمقـشة .. وبسفرها دغري وبتحل عنو وعن وشي. أنا رح نفـذ الخطة "م" .. ومتل ما ورجَـيتي نجوم الضهر يا لئيم .. رح أعمل فيك ضرب وجـعو أليم

وكان شكيب مسافر كم يوم بشغل .. هو ودعها من هون ودغري على غرفة سوما بالمـقشة حتى تنـزل فيها قتل. وبدون مقدمات نسفـتها كف على وجها شي تنين رطل .. حشتها من شعرها وبطحتها بالأرض .. وبالمـقشة صمتـتها بدن بالطول وبالعرض. هابيـبي مستر ما هيك يا آفية .. يبـعتلك مرض وتـشحدي بالطريق حافية. قومي انقبري إمشي قدامي .. رح خليكي تعضي صابـيعك ندامة

وبـيومين سوما على بلدها تسفرت ..  وجوزها استقبلها عالمطار .. اي قبرها بإيـديها حفرت

رجع شكيب من السفر بسلامتو .. واستـقبلـتو بشكل كتير عادي مدامتو. استغرب أول ما لاحظ انو سوما مش موجودة .. وسأل ظريفة عنها بسذاجة مش معهودة. قـالتلو يي ما عرفت شو صار بغـيابك يا رجال .. مرضت سوما وصـابتها أوجاع لا عالخاطر ولا عالـبال. أخدتها عند الحكيم وطـلبلها تحاليل .. ووصفـلها مؤقـتا دوا مسكن وتحـاميل. طلع معها مرض خطير ومعدي بالدم .. قـاتولي وما إلو للـيوم علاج فشر السم. أخـدتها عند كذا إختصاصي .. وبس قالولي معها أيدز ما عـاد حملني راسي. سفرتها دغري على بلادها هـوا .. حزينة خليها تقـضي آخر أيامها بين ولادها ويعـيشوا يومين سوا

يا معتر يا شكيب، نزل عليه الخبر متل المهدة .. وجمد بأرضو بفرد جمدة .. وتخرسن وانكمد بفرد كمدة. ومن يومها تغيرت أحوالو .. وصدت نفسو عن الأكـل من رعبتو على حالو .. فقد ثـقـتو بنفسو وصار يخاف من خيالو. بـيعرف إنو إذا لاقط من سوما الفيروس رح تكون أيامو معدودة .. وإنو علاقتو بمرتو بتصير خطيرة ونتـايجها مش محمودة. وصارت كل ما ظريفة لمستو يـزط .. مع إنو الأيدز من اللمس ما بيـنط .. وصار كل أسبوع يعمل فحص وعلى طول شـارد وحاسس بالذنب وبالنقص. بقي على هـالحالة شي شهر .. ونزل وزنو للنص من الرعب والقهر، لحين ما خبـرتو ظريفة كل القصة .. وشبعتو دواعي وعملتلو رصّة .. طلبت منو الطلاق وبقـلبها حاضرة الحرقة والغصة

وفيكن يا جماعة تـتوقعوا الباقي .. أنا من سيرة هالقصة ضاقت خلاقي. وصار فيكن تستخلصو العبر .. متل عين الشمس ما بتعصى على النظر. فديروا بالكن يا جماعة منيح منيح .. والباب يللي بيجي منو ريح منسدو ومنستريح، ومش كل مرة بتسلم الجرة .. وانتبهوا على ولادكم كمان بالمرة ... إنتو أوعى منهن وأعلم بالمضرة

هلق رح أترككن .. بس موضوع الخادمات أنا عندي ما انتهى وبقصصهن راجعلكن ... حتى أشرحلكن وفسرلكن .. وإذا ما بتـقـروا وبتـنشـروا يا دلكن