شيح بريح...إجانا ولد بس ما حسبناها منيح

وإجانا أول ولد ومن الفرحة كنا ح نطير... واستبشرنا بولادتو وفرقعنا بعد نص ليل، على عين وسمع كل جار عضوّ القمر سهًير. يسلملي هالصبي متل القمر شو بيشبهني لما كنت صغير... متل البدر كأنو أبن شي سلطان أو أمير. صحيح حالتنا على قدنا... بس بين الناس منظورين كتير. عارفين تربية الولاد مكلفة وصعبة بس إتكالنا على ربنا، هو ولي الأمر والتدبير. فرحولنا الأهل والأصحاب... وعلى مدى أسبوع كل شوي عنا يندق الباب. جايين يهنو الأحباب ... ومن كترتهن، تكسرت بـبيتـنا العتاب. ياي شو إجانا هدايا من تقيلو، ولك شوفو الدهب... إجانا منو شي نص كيلو ... وأنا ومرتي كل ما واحد قدم هدية وهنانا، من نص قلبنا نتشكرو وندعيلو

هلق أكيد في ناس مش ميسورة، في يللي حسب ميزانيتو هدانا برواز صورة، وفي مين قدم طقم فناجين قهوة مدري ليش، الله يعين بعض العيل المستورة. أصلاً، حدا بيسترجي يجي وأيدو فاضية... أي مرتي مش هينة وكانت على هيك عـَملة ما ح تردلو ياها بضربة قاضية

خلص أسبوع التهاني ... وقعدت أنا ومرتي نعد ونجمع قيمة الهدايا الحرزانة. قلتلها بتعرفي يا مرا، على هالمعدل ... منجيب عشر ولاد وبالهدايا اللي بتجينا منغـنى لا منعوز ولا منتبهدل. قالتلي طول بالك يا رجال كلو وفا ودين، وبكرا بدنا نرد الهدايا بأغلى منها إنو ولـَــو.. ما إلنا عين . وما تنسى أنك مزوج بنت البيك، ويللي بيجبلي بمية أنا بجبلو بميتين. بس هيدي جارتنا، يللي نقطتنا بمنشفة حمام، بأول مناسبة رح إهديها هدية تناسبها تمام....على قلبهن المال متلتل ... فشرت عيلة داينستي ... إنتي شفت الدهب والألماس من ساسها لراسها كيف مشنشل ... وما بدي طول عليك، ناولني شي ميتين وخمسين دولار... بكرا تهناية بنت عمي منار ... نقطتنا هدية لإبنك، وأنا اليوم فصلت بالسوق شو بتسوى بالنهار

أنا سمعت هيك وعقلي من مطرحو طار... قلتلها الميتين وخمسين بهالايام بتفضح، يا ستار ... شو شايفتيني نايم على بنك واللا مصرياتي كتار. بيعي هديتها وبتمنها اشتريلها سوار. قالتلي لأ... بكرا ببيسألوني صاحباتي شو جابتلك منار... وإذا ما ورجيتهن هديتها، أو عرفوا إني بعتها، دغري بتنتشر الأخبار. قلتلها طيب خدي المبلغ عن رف الخزانة، لا بدي لسانات تجيب معدلنا ولا تتركب مقلتنا ليل ونهار

تاني يوم المسا، ونحنا عم نشرب القهوة.. خبرتني مرتي خبرية نقزتني، وعلى النقزة، إندلقت على تيابي الركوة. قال شو ... صديقتها فـُـتنة.... يللي سنسال هالسِمِك من الدهب لأبننا هديتنا ...على عرسها، تفرح من إبنك، عازمتنا ... ورقم حساب الليست دو مارياج عطيتنا... وبدنا نرد النقوط كاش، حتى يعرفو محبتنا... ونعمل من قيمتهن، متل ما هني عملو من قيمتنا. أنا خبرتني هيك ودمي فار.. وعبق وجي وقلبي شعلت في النار. قلتلها لمرتي ليكي ... لا وزير أنا، ولا نايب، ولا مقاول بمجلس الإنماء والإعمار... ولا فاتح قناة فضائية تبع يللا اتصل على هالرقم وحزار... شي مدورعالبيكار، وحزير العدسة يا حمار. شو بدنا نعمل هلق أنا محتار ... كنت بتدين من المختار .... بس بعدنا منتخبينو طازة، ومن كم يوم صدر بتعيينو القرار ... وشكلو من المصاري منفض، من كتر ما وزع عالناس مساعدات، قبل التصويت بنهار... لو كانت صديقتك فـُتنة عملت عرسها من شي أسبوع ... كنا لحقنا حالنا وكان ديني باليرة وبالدولار... مش محبةً فيي طبعا... بس لأنو بيعرف إنو إذا فت على الإنتخابات كيلو، بيردهن بعدين قنطار

قالتلي يا رجال ما في حل، إلا إنك تاخد شي قرض من البنـْـك ... وتعمل تأمين، حتى إذا صار ما صار، شركة التأمين بتدفع عنـْـك ... شو بدي قول ... سكتت وسديت هالحنـْـك... اي ما بدي الناس تقطـع بفروتي ... ولا تبعد عني عـِزوتي ... ما أنا كمان ضارب حالي بحجر كبير متل مرتي ... وكلها كم سنة وبسكر القرض ... شو بدي أعمل، ما عم تنحل معي لا بالطول ولا بالعرْض. وغير هيك، رح يصير صيتنا بالأرْض

وتالت يوم طقة الضهر، كنت بالشغل ومرتي اتصلت بالتلفون ... كنت بعدني شي فاتح لسِدْ جوعي علبة تون. قالتلي هالو حبيبي ... ليك يا قلبي ويا طبيبي ...على علمك صرنا على الجنط واضطريت إكسر القجة، ناطرتك ما تتأخرعاملتك على الغدا عجة. بس أنا حربوق لقطتها عالطاير... وقلت أكيد في شي صاير... ما رح أنطر وأبقى حاير ... هي عادة بتقللي حبيبي ... بس أول مرة بتقللي طبيبي ... هيدا الظاهر في شو مصيبة. قلتلها شوفي إنتي هيك وغـْوَشتيني ...ولعب الفار بعبي، تعي من الآخر وخبريني. قالت ما في شي، بس مرتو لصاحبك مهيب، عزمتنا على سهرة عاليخت... بمناسبة خطبة بنتها، على حظنا هلق إجاها البخـْت. وأنا من وقت ما قالتلي بعدني لهلق من وجع راسي ملقحة بالتخـْت. متل ما بتعرف، بدنا نرد الإجر بهدية ... من وزن أونصة الدهب اللي هديتنا هي ... فشوف من عندك كيف بدك تدبر القضية

أنا على هالخبرية صرت غرد متل الكنار، أكيد مش من الفرح، بس الظاهر إجاني عارض إنهيار. تمالكت أعصابي، وقلتلها ما في بقا عندنا إلا حل وحيد ... نهار العزيمة بتعتذري منها، بحجة أنو جوزك كتير مريض ... وهيك لا بتزعل منا ولا ديوننا بتتراكم وبتزيد. قالتلي الخطة تبعيتك مكشوفة وقديمة... وهيك حجة ما بتقلي عجة، ولا بتمرق عليها هاللئيمة ... وبتصير تكترعلينا الغيبة والنميمة. وبعدين وين بدنا نهرب ... بكرا بتتزوج وبتصير مستقيمة ... وما في مهرب بالنهاية من إنو نرد الأونصة الدهب، بهدية مناسبة عليها القدر والقيمة

يا جماعة شو الحل دبروني، يستر على عرضكن عينوني ... ليك ليك ليك ... قال عم أطلب من القراء يساعدوني ... ما هني صاير فيهن متلي، وبأكتر من السكوت ما رح ينقطوني . ياما قالتلي ماما الحاجة ... على قد بساطك مد إجريك ... وحاجي تتكبر وتركض ورا المظاهر، اي بتروح عليك .... وما تعاشر ناس إنتي مش قدهن ... وتتعب حالك حتى تشد على مشدهن ... وشو ما عملت ما رح ترضي الناس ورح يبقو يحكوعليك قد ما بدهن

شو فهمنا ؟ رح تعملو بنصيحة ماما الحاجة؟ وللا بناولكن من عندي بشي قرص عجة