شو هالحــالة يــا خـــالي

لحد هلق صامد بس مش صامت ... مصدوم من هالوضع المأزوم ‏‏... صاير لئيم وبطلت مهضوم ... ما عاد حدا طايقني ولا بعدني بهالبلد مغروم ... مألوم ‏وعلى حالي مقسوم ... مطروح ومضروب ... مخفوق متل الدريم ويب ولحمي من القهر مفروم ‏‏... مكروب ومعطوب ... ناطر المكتوب اللي ما منو مهروب ... أنا مش مسيس ولا على حدا محسوب ... ما عم ‏البس أزرق عم البس موف و روز ... وعم إتجنب الأصفر وموقًف ‏أكل الموز ... لا حامل فرد ولا عندي مترليوز

‏مقـــروف ... خلص المصروف ... وضعي منتوف ... بطلت معروف ‏‏... نسيتني الحروف ... مرمي بوسط الريح وعالصبر مشلوف

‏ صاير راسي متل الملفوف .... ومخي متل المرطبان كأنو من جوا ‏بالمقشة مشطوف ... حاسس حالي مستوي وقربت صير ‏مقطوف... ناطر الرسالة الظنية يللي جوات المظروف .... لابد ‏على وضعي ولوني بسببها مخطوف ... خايف من حفلة لا ‏فيها عرسان تمشي تحت السيوف ... ولا فيها مواويل ولا غنا ولا ‏دق دفوف ... فيها لعلعة رصاص وأصوات كلاشنكوف ‏‏... مدافع وهواوين وأنا يا حسرة مقصود و مقصوف

‏البلد كلو مكشوف ... حاسس حالي مش محمي وبيتي مش ‏مسقوف ... لا بقا ينفع اتخبى بالطابق الأرضي ولا بالطابق الروف ... ما ‏بقا معي مصاري حتى استأجر بعاليه أو بالشوف ... قلقان وقلبي ‏مجلوف ... من أنواع المخاطر يللي الوطن فيها محفوف ... ‏والبلد عم يطوف ... مش بس بالشتي كمان بالسلاح المرصوف ... ‏المصفف عالرفوف ... أو يللي بالمخازن محشًى بالألوف

‏ ‏حاسس حالي متل الخروف ... بين الجدي والتيس اللي قرنو ‏معكوف ... لا هيدا بيذوق ولا هيديك من حالو مكسوف ... واحد ‏بالأذى مشغوف ... والتاني بالحقد معلوف

‏ ‏أخ يا عجزي ... وجي صار منقوف ... محرًك معي الروماتيــــز ولابس ‏كلسات صوف ... ومعي حالة سك ركاب وضاربني وجع ‏بالغضروف ... والديسك تاعبني وضهري شقفتين مشقوف ... ‏من كتر الهم يللي عالغم معطوف... بعد ما نسيت شو أكلنا ‏بالماضي ضروبي وشو أكلنا كفوف

حاسس حالي على الذل محدوف ... وإني مش مواطن ومن لوايح ‏الشطب محزوف ... بلدنا ما عدنا أهلو صرنا فيه بس ضيوف ‏‏... ما عدت قادر أقعد مكتوف ... تعبت من الوقوف ... ع بواب ‏السفارات متلي وأمتال هالمشهد صار مألوف ... ولك عطونا ‏فيزا اعملوا معروف ... وتيكيت وان واي بلا رجعة، ما رح ‏تتحسن الظروف ... بغبلي شي سنتين وبجي زيارة تا اتفرج ‏وشوف ... و إسبتلكن كيف على هالبلد مش مأسوف

ليش على بعضنا مش عم نلوف ... العدل موقوف .... والظلم ‏موصوف ... والاقتصاد منسوف ... والشعب مش منصوف ... ‏وعلى شوية أمن وأمان ملهوف

‏يا عمي شبعنا من طبخاتكن لا بدنا من إيديكن نتبقًـط ‏منسف ... ولا بدنا نتحلى لا بــبرازق ولا بــسنيورة ولا بــصفوف ‏