مونديال العجايب اللبنانية

الطابة الطابة ما غيرها .. طابة الفوتبول .. هالأيام غريب شو حابيـنها وحابتـنا .. صارت سيطرتها واضحة على عـقولنا، يخرب زوقـها شو تاعـبتـنا .. من هوسنا فيها، عن أشغالنا ومصالحنا مأخرتـنا .. صرنا منفـيق ولياقـتنا البدنية خاذلـتنا .. وأجسامنا مكسرة من التعب .. كأنو نحنا اللعـيبة أو كأنو مشقـفين حطب .. وبتحـليل المباريات والتـزريك والنـكايات غرقانين لشوشـتـنا .. عاملة على فهمنا ووعـينا بلوك وحائط صد، وبنص ملعـبنا محاصرتـنا .. ضاغـطة على أعـصابنا، وبمقاعد الإحـتياط عن سيـسرة أمورنا وانـتباهنا عـن يللي عم يصير حولنا مقعـدتـنا.

يا محلا ضربة الشمس إذا صابـتنا .. من وجع ضربة الجزاء يللي أهـدرتها فرقـتنا. صرنا منحتار كيف نمرر دوام عملنا، ومنـتعمد إضاعة الوقـت لأنو ما دايـرلنا شي .. هي بس أجواء الفوفـوزيلا دايرتـلنا. مـنـنطر مـناطرة صفرة نهاية الدوام، تا نركض على بـيوتـنا أو قهوتـنا .. ويا دوب نلحق الشـوط التاني إذا عـجقة السير ما مـنعـتنا .. ولك يا دلو إذا إجانا شي زبون بالـوقت الضايع، واضطـرينا نمدد لوقت إضافي فتح دكانـتـنا

صرنا بـبـيوتنا وقت الفوتبول مـنـنفرد بأكبر تلـفـزيون عنا، وبناخـد كـورنر حتى المباريات نحضر .. واذا جرب حدا من ولادنا يحاكـينا أو يلهـينا، منرفع بوجو فورا الكارت الأصفر .. للـتـنـبيه من مـغبة الـتـشويش ومحاولات الإختراق لتـركيزنا، وانـذار أول حتى فـعلو ما يتـكرر. وإذا كان فريقـنا آكلها جـول طازة أوعن التـأهل وضعو مخـوطر .. يمكن نفاجئ فـلذة أكبادنا من قهرنا، بشوطة أرضية زاحفة، أو بـدوبل كيك عـلى المقص الأيسر .. وإذا كان حـظو حـلو، منرفع بوجو بس الكرت الأحمر .. ومنـطردو لبرا آوت أو من إيدو لبرات الغرفة بـيـتجرجر

صارت لمسة اليد من نسوانـنا منقـابلها ببـرود .. ودعوتهن إلنا لشي ماتـش، منواجـهـها بعرقـلة لمساعيهـن أو بسرود .. أو مندعي الإرهاق والشـد العضلي، ووقت المباريات عـالفرص الضايعة والأهداف منـنطـنط متل القرود

هـلق أكيد في نسوان كمان بتـتابع المونديال وبيصير معها نفس حالة الشرود .. إن كتًرت تـكرم عينك بين الشوطين قبل ما اللعـيبة عالـملعب للشوط التاني تـفوت. وفي نسوان بتحس كأنو إجا الفرج الموعود .. وبتـدعي للفـيفا من نص قلبها على هالمبادرة الكروية، وبتـتـشكرها على التـنـظيم وعلى هالمجهود .. وبتلاقيها فرصة سانحة ما بتهـدرها، وبالبـيت ما بـيعود يجـيها قعود .. ولحقوا يا رجال على مصاريف الشوبنغ وعلى خربان البيوت

إنو بـيصير هيك ملهيـين؟ عالفـوتبول نايـمين وقايمين؟ ناسيـين البلد والمونديال مسيـسين .. وتاركـين هالشـويطة حواليـنا راحتـهن آخدين .. بيـشـوطونا كل يوم ميت شوطة لا مـنـنهـز ولا حاسين .. وبـيـسجلوا أهداف بمرمانا ويا ريتها أهـداف نظيفة ونحنا لابدين

كانوا كل يوم يهزوا شبـكتنا العصـبية وحبوب الـزانكس على طـول كنا مجهزين. وكانوا كل يوم والتاني يـنطحونا ويتـلاعبوا فينا متل الطابة ونحنا راسنا مطاطاييـن .. متحزبيـن ومتفرقين .. وعالعـمياني وراهم ماشيـين. كان كل كابتن منهن متصدر مجموعـتو وعامل منها تيم .. وجايـب لفريقو مدرب أجنبي، بدل المدرب الوطني، على قد ما غشيم .. ومعين حراس لمرماه وناس عن سعـادتو مدافعين .. وعندو خط وسط كشـتبـنجية حتى يمسكوا الساحة ويلعًبوا عـالشكَر بَكر مجموعات المنافسين .. وشي تـنين مسؤولين تـقالة على الهجوم، واحـد ويـنغ شمال وواحد ويـنغ يمين .. وشي تـنين حريفة، حتى يلعبوا كـرأس حربة مهاجمين .. ليهدّف فريقـو بمرمى الفرق التانـيـين .. ويتفوق هو ويسيطر لوحدو عالسلطة، ويبـلع خيرات البلد وكـل شي فوقها وتحتها في فـيتامين .. يحتل الصدارة ويسيطر على الوزارة ونحنا على المصلحة العامة مش مـنـتبـهين ... وكنا هانـز بأيدينا واوف سايد بإجـرينا عم نسجل جـوال بحالنا ومرمى وطـنـنا ومش واعيين

اليوم بشهر المونديال بالفوتبول جـانين وفـانّـين .. تاركينهن يشوطونا قد ما بدهن وعليهن ما رادين .. وعم يـنفردوا فينا على راحتهن ويمرقوا بين بعضهن باسات ونحنا ساكـتين .. وتاركين الأتحاد الدولي عم يحضرنا خطة هجوم سياسي ودبلوماسي ونحنا مشغولين .. بالمنافسة على كاس العالم ولمـنـتخبات الدول الغربية مطبـلين ومزمرين. وبالتـزريك لبعضنا صقـلى ومكترين .. مـتـناسـيين مـوضوع سفينة مريم وناجي العلي، لا متابـعين أخبارهن، ولا إمتى على غزة طالعين

شو لابقـلنا نكون وطنـيـين .. منكّسين أعـلامنا وأعلام غيرنا رافعين .. ومزينـين سياراتنا بصور نسوانهن يـللي نص تيابهن شالحين. ركبنا صورنا بنص عـلم الأرجنـتين ورسمنا على خدودنا علم الإسبـانيـين .. وجوهـنا احمرت واصفرت واخضرت من كتر التلوين .. ولك فانيلات فرقهن صرت تشوفنا عالصبحية وبالسهرية لابسين. ويمكن في منكن مش فطنانين ..على التياب الداخلية يللي بأعلام المنتخبات المشاركة متلاية الدكاكين .. يمكن عارفين إنتو وحضرتكن منها شاريين .. ونحنا لا شايفين شي ولا قاشعين .. دخلكن .. بـيناتـنا .. لمين عم تلبسوها لمين

ولك فاول علينا كلنا وستـميت فـاول حاجي تايـهين .. بأرض ملعبنا وبين جمهورنا مفرطـعين .. خوفي ما يفـقعونا شي شوطة بنالتي تجـيـبنا عالأرض يا حكم ونحنا مش مـنـتبهين ..على تسلل الجواسيس وأعـوان العدو يللي بـينـاتنا مندسين

إمتى رح نـتأهل ونوعى ونصير فريق واحد تخمين .. ونسجل أهـداف ذهبية لصالح الوطن وصالحنا نحنا المواطنين .. بدل ما نبكي على الأطلال لخسارة البرازيل أو الأرجـنتين. إمتى رح نتأهل بلبنان لنكون كلنا إيد واحدة ومع بعض متحدين .. ويترابط خط الضهر مع خط الوسط والهجوم، ونصير ملعبنا اللبناني من أولو لآخرو ماسكين .. ونمرّك على أعداء الوطن، مش على بعضنا نبقى فايرين .. وساعتها بتـتحسن أحوالنا وبـينـتعش اقـتصادنا بدل ما نبقى هيك ضعـفا مفـكـكين .. وبوقـتها ما تستغربوا، إذا بـيوم من الأيام خضـنا التصفيات، وتأهـلنا تا نلعب بشي مونديال، من تـنظيم قـطر أو واحدة من جزر الفيـليـبين