خللوا مطــرح للبطيــــخ

في حدا منا ما بيحب السياحة؟ يضهر برات البيت ويقضيلو شي أسبوع رياحة. باسطنبول .. بكوريا بسيول ... بالباهامس عا شي سنسول ... أو بسفينة الحب يمضي الوقت ببركة السباحة؟ هيك خطرلي بهيديك النهار أنا وشارد عم قرقش تفاحة. يضرب حظي، العين بصيرة واليد قصيرة . يلا يا ولاد قوموا نضهر نتروًق فول ...عا شط البحر بشي مطعم كول. وبعد الاكل بتـتـفـتًلوعندو بالباحة. ولك حدا عندو ربوع بلبنان وبيفكر يسافر لتـنفلح جيـبتو فلاحة. وبعد السفرة بتجي الفكرة وعلى قد ما صرف، بيعملنا مناحة

أخترنا مطعم مشهور وعندو مطارح بلزق الشط ... إستقبلتنا المضيفة بالأهلا والسهلا وولادي من فرحتهن ينطو نط. سألتنا وين منحب نقعد، بالمطعم الفوقاني المكيف أو تحت حد البحر نتصيف. قلتلها بفضل تحت حد المي بالهوا الطلق ... ونكزتـني مرتي حتى ما إسترسل بالحكي وأنجلق. قالتلي بدي منك إعتذر لانو كلو تحت محجوز ... كان ضروري قبل بيومين على الأقل تتصل فينا حتى على طاولة تحوز. إضطرينا نقعد فوق بالمطعم المسقوف... قلنا معليش مش مشكلة من ورا القزاز البحر منشوف

إجا الجرسون قميص أبيض وبابـيونة لابس ... بس ما عارف ليش ما عاطينا وج وبخلقتـنا عابس. يمكن لأنو المطعم كلاس والجرسون من الطبقة المخملية ... شايف حالو ما في غير هيك هيدا السبب بالمية مية. طلبنا فتة وفول وصحن حمص بطحينة ... حضر الأكل وما جابوا زيت فطلبنا يجيبولنا قنينة

هلق صحيح الفول والفتًة طعمتهن مرتًة. بس ليش صحونة الفول كل واحد في نصًو؟ شو بعيًط للجرسون ببهدلوا وبرصًو. وعينكن ما تشوفوا السرفيس. لخمس صحون أربع عروق نعنع ومغيص ... حبتين بندورة بصلة وخيارتين وكم فرمة كبيس. طنًشنا وقلنا ماشي الحال ما جايين نسم بدننا ونعمل لصاحب المطعم زفًة ... معدتنا صغيرة ومنظر البحر من وراء القزاز بيكفًي

من أول كم لقمة فول، حسًت مرتي بصحنها في شي غريب ... قاسي ولونو بني وشكلو مقلق ومريب. طلعت شقفة فخار بحجم الزيتونة ... الظاهر الطباخ هو وعم يحرك الفولات، إنكسرت من قدرة الفول شقفة فخار يا عيوني. بعتـنا ورا الجرسون حتى بنفسو يشوف ... وسمًعناه كم كلمة لا انهز ولا بين عليه إنو مكسوف. أخد الصحن الملغوم وراح يراجع الإدارة ... نطرنا شوي وكنا مترقبين شو رح يكون قرارا. قللي إبني الكبير: يا بابا ببلاد برا بترفع عليهن دعوة ... وبيـبوسولك إيدك وبيعتذروا وبيعطوك تمن سكوتك ثروة. قلتلو يا بابا نحنا بلبنان .. لا بفرنسا ولا باليونان.. قللي إبني التاني: أنا بتوقع يا بابا يعفونا من دفع الحساب ومنيح إنو الماما ما كدشت الفخارة وانكسرلها شي سن أو شي ناب

قلتلهن يا ولاد لا تكبروا الموضوع ما بدنا نحط دابنا من دابهن ...غلطة منهن وصارت وبيكفيهن الإحراج يللي صابهن. بعد شوي رجع الجرسون وقرًب منا واعتذر ... وجايبلها للمدام نص صحن فول جديد بدل الصحن اللي انعـوَر. إتطلعنا ببعض وكتمت الغيظ اللي بنفسي ... ورجعنا ناديناه عن جديد وواجهناه أربعتنا بعبسة ... قالتلو مرتي خود الصحن ما بقا بدي آكل لعيت نفسي

أكلت أنا والولاد وخلصنا ... من بعد ما انفـقسنا ... يللا منيح يللي مرقت على سلامة وما انمغصنا . وإجا الحل بكل عزم ... بعد ما التآم مجلس الادارة وأصدر الحكم. جاط كبير من الفواكة جابولنا ... وأهلا وسهلا عن جديد قالولنا. قلنا يا عمي تسرعنا بالحكم عليهن ... إعتذارهن بهالطريقة مقبول تسلم إيديهن. ليكو كرم الضيافة اللبنانية. أناناساية موزتين وليمونة .... نجاصتين وحبة جريفونة. بطيخ أحمر وشمام ... برافو، إلتزم المطعم بالإعلان ... تبع وزارة السياحة وطبقوا بالتمام. إنو خللوا مطرح للبطيخ ... البطيخ علينا ... ولك إي ، ما نحنا كرم الضيافة من تراثنا ... وبعدنا حاملينو لليوم شعارنا. المهم يا سايح تـنبسط ... حتى الموسم السياحي ما ينفرط ... فلا تخاف على جيبتك ما تـنقرط ...عيننا مش على جيبتك ... الهدف نحفظلك هيبتك

الحاصل أكلنا فواكة وطلبنا الحساب ... ويا ريتني خليت الفاتورة وبعتها على مجلس النواب ... عيب يا جماعة عيب ... منزلين الفواكة بالفاتورة ... العمى بعيونكن شو كلاب. ذكروني بالكشتبنجي الجلا جلا ... صاحب القهوة بالبرنامج التلفزيوني النصاب رمًا البلا. بعتنت وراء الجرسون وقلتللو شو هيدا يا ولا... نحنا ما طلبنا فواكه وهلق الموضوع بالنسبة إلنا توضح وانجلى. ومرة تانية فاتت الإدارة عالخط ... عملتلنا حسم عالفواكة، دفعنا الفاتورة وعالبيت دغري زطينا زط ... يا حسرتي علينا، قضينا نهارنا كلوعم ننكَتً

يا خيي بطًلنا نسترجي نروح على مطعم .... ما في إلا منرجع عم نتسمسم . يا بهيم اربح الزبون أحسنلك، ملًيلو عينو بجاط فواكة على حسابك أربحلك .... تــلليلو الطاولة حشيش وخضرة أنسبلك ... وتلات ارباع جاط الفواكة والخضرة متل ما حطيتو بيرجعلك

نِضرَب شو خرجنا ننمًي السياحة ببلدنا ... ولك السياحة مهمة لإقتصادنا ومدخولها سندنا. اتركوا بقا هالخصلات ... ولك بلاها يا جماعة هالحركات . وإنتو يا قراء ... ما تنسوا بس تروحواعلى مطعم ، ما تنزلو بالأكل طاخ طيخ ... خللوا بمعدتكن ... مطرح للبطيخ