دق الماني تي رش رش

 طلع النايب هالمَنتَـش .. الأصلع اللي وجو منمًش .. عالتي.في تا يـتـفَـشفَـش .. بواحد من صنفو مخَشخَش .. شايف حالو ومكنفَـش .. بقلوبن حقد معَـشعش .. الأول بالتاني تحركش .. والتاني بلسانو لـبًش .. وهجم الأول وتفركش .. وعا شوي الستوديو اتـدَشـدَش .. ودق الماني تي رش رش

على وضع بلادي موَغوَش .. مترقب ذهني مشوًش .. المجتمع الدولي هوًش ..  بالتمويل عم يتـكبًـش .. يا بتدفع يا بـتتـنهوَش .. تفاحة عم نـِتكـدوَش .. ما تخلوا علينا مَكمَـش .. المال اللي منا محوًش .. مندفع ولا نِتخرمَش .. ودق الماني تي رش رش

على ضهر الشعب معَربَـش .. بكرسي معبًط ومكمًش .. جيابو برَشاوي مدَحوَش .. على ثروة كبيرة مكوًش .. منغـنغ حالو ومريًـش .. ما بـينسأل ويـتفتـش .. وأنا اللي جيبي مبَخوَش .. وبهموم الدنيا مكلبش .. والراتب ما بيترَتوَش .. حتى شوي إتـنـشنش .. ودق الماني تي رش رش

موسم الشتي مبلًش .. واصل من شغلي متـشـتش .. خالص كازي وملَـشلش .. من فوقِ لتحتِ مبَـشبـش .. بِنهورة ميً مطبًـش .. والصرفِ الصحي مفنًـش .. ويللي بالسبً تدوًش .. بـبيتو حردان مطشطش .. ودق الماني تي رش رش
 
راحت أيام الكشكش .. والطويل اللي مزركش .. دارجلك هالمقطًش .. للسترة البدن تعطًش .. بوشِم عما يـتـنقًـش .. الصدرِ منفًخ ومفوًش .. والخد محشي ومنفًـش .. الشعر عيارة ومكنفش .. ودق الماني تي رش رش

تي رش رش دق الماني .. هالحالة شو تعباني .. والشًعِب عم بيعاني .. من عكار للوزًاني .. والحبوسة مليانة .. بـِبَرئ و بِجاني .. وبدهن زفة السجًاني .. الدولة أوأو غفيانة .. حتى ما قول شي تاني .. جلدي ما عم يرعاني .. وتي رش رش دق الماني

تي رش رش دق الماني .. الجَرايم شو كتراني .. والنشًالة فلتاني .. السرقة نارا سعراني ..  ناس بالدنيا زهداني .. وناس مقهورة وزعلانة .. وناس عم تشحد حفياني .. وناس سهراتُن ولعانة .. وناس عم ترقص سكراني .. غناني بأتفه مَعاني .. وتي رش رش دق الماني