شـو هـي وقـفت عليـــك؟ الجـزء الأول

 خليل : يا صاحبي شو قصتك كل ما زورك بلاقيك مهموم وعايف حالك؟

يا خيي مصروفنا صاير كبير، وما عدت عم لحًق على الطلبات. مرتي ساعة بدها سيارة جديدة وساعة بدها تعمل عملية تجميل وساعة بدها تغير ديكور البيت. من وقت ما سكننا بهالبناية وأحوالها تغيرت. كل يوم صبحية عند جارة وكل جارة بتقسًم عليها. واحدة بتـورجيها شوغيرت بالصالون وواحدة بتحكيلها كيف قضت العطلة بباريس وواحدة بتاخدها كزدورة بسيارتها الجديدة موديل السنة. يا خيي ومرتي صايرة قدامهن محرجة وما عم تقدر تجاريهن. ليش ما بتاخدو شاليه عالبحر وليش بعد ما غيرتو السيارة وليش بعدك حاوية هالبلاكبـيري، ما صار نازل من بعدو تلات موديلات. والنق كلو طالع فيي وأنا كلو هالشي ما إلي طاقة عليه. ولك مرتي صايرة بـتقعد ساعات ساكتة وصافنة وانعكس هالشي على جو البيت وأنا بالنهاية موظف. صحيح مدير شركة طويلة عريضة، بس بالنهاية الموظف شو حيلتو غير معاشو

خليل : فهمت مشكلتك يا صديقي وفهمت المحيط يللي عايشين فيه كيف مأثر عليك. طيب وهول جيرانك تجار كتير كبار، حتى عم  يلعبوا بالمصاري لعب؟

ما أنا هيدا يللي مجننًي. واحد موظف بالسلك القضائي وواحد بيشتغل بمجلس الإنماء والإعمار وواحد موظف بلدية وشي بالمالية وشي بمصلحة حماية المستهلك. يعني كلهن موظفين متلي بالنهاية

خليل : يا صديقي. ما إنتي لو بـتلحلحها شوي، كنت بتغطي عليهن كلهن، وبتصير محط  الأنظار وإلإعجاب والتقدير مش بس بين جيرانك، بالبلد كلها. إنتي لو بتطاوعني بس

هات حتى شوف. شو بتقترح عليي؟

خليل : استأجر قناة فضائية؟

نعم؟ قناة فضائية؟ بس هيدا مشروع كبير. بدك معدات وموظفين ومراسلين واستديوهات وتسويق وإعلانات وأفلام ومسلسلات وتكاليف بملايين الدولارات وبدك وبدك وبدك. أنا قد هيك مشروع؟

خليل : حيلك عليي وسمعني للآخر. الموضوع ما بيكلفك كتير. كل يللي بحاجة إلو هو أيجار سنوي لـقناة فضائية. غرفة كبيرة بالأجار بأي دولة خارج الوطن العربي بتعملها ستوديو. شوية أرقام تلفون وبنـتين حلوين نغـشين مشخلعين وشوية مصاريف ومعدات. يعني كل المشروع ما بيكلفك ماية ألف دولار. يعني بـقرض من بـنك أو تـنين بـيتأمًنو

شو عم تحكي. وشو بدك ياني بث ؟؟ خـلاعـة ؟؟ أنـا وجي هالـوج؟

خليل : يا خيي مين جاب سيرة الخلاعة؟ قول هيدا مشروع تاني بـيطلع دهب بس هيدا ما إلك. هههه أنا مفكر فيه لنفسي. ليك الموضوع بسيط. كيفك بالحزازير؟؟

ما عم إفهم عليك

خليل : حبيبي باختصار، البنـتين المشخلعين بيحزًروا حزازير هالهوا مباشر، ويللي بيحزر، بيربح جـائـزة قيًمة عشرين ألف دولار نقدا أو بطاقة حتى يحضر سباق فورمولا وان. وأغلب المشاهدين بهالوطن العربي غرامهن الحزازير والمياصة والربح السريع. يعني مادة البث وأدوات التسويق مأمنة

بدك تخربلي بـيتي؟ وأي إعلانات فيها تغطي قيمة كـل هالجوائز. بدك تفـوتـني بمشروع كلو خسارة بخسارة؟

خليل : ولك أي إعلانات أي جوائز وأي خسارة؟ الموضوع أبسط من هيك بكتير. بتـختار حزازير سهلة يعني أي مشاهد قد ما كان مجدوب بيـقدر يجاوب عليها، مثلا : فاكهة إذا قلبت إسمها بـيبقى الإسم متل ما هو، أو شو هي العاصمة العربية يللي آخر تلات حروف من إسمها على أسم حيوان ضخم. وخدلك على إتصالات بالآلاف يوميا من داخل وخارج الوطن العربي

أي ووين الربح؟ رح تجـنني إنتي. حـزازير سهلة وجوائز بدها ميزانية قد ميزانية المحكمة الدولية

خليل : ولك روق عليي شوي. ما على حساب مدير شركة وبـتفهم ولَووو ! إلقطها على الطاير يا زلمي. أول شي بإتـفاقك مع شركة الـتلفونات، كل دقيقة بـتكلف المتصل دولار، وإنتي بـيطلعلك منها نص دولار وطبعا يللي متلفن رح ترد عليه مكنة تسجيل تًمرك عليه بدل دقيقة الإتصال دقيقتين إذا ما تلاتة. يعني مثلا "للغة العربية إضغط على الرقم واحد وللغة الإنكليزية "إضغط على الرقم تنين" وبـيرجع "للإجابة على الحزورة إضغط على الرقم واحد ولإلغاء المشاركة إضغط على الرقم تنين" وبعدين "الرجاء الإنتظار قليلا ريثما يتم تحويل مكالمتك" وبعدين "جميع الخطوط مشغولة الرجاء معاودة الإتصال بعد قليل". وهيك نفس الفرمان مع كل متصل

أف... افدح حريمك شو داهية. طـيب لما المشاهد يللي عم يتابع، يشوف إنو ما حدا عم يتلفن ويشارك، ما رح يشك بالموضوع؟ وهالمتصل يللي تلفن أول مرة وما لــقًط معو الخط،، شو يللي بدو يخللي يرجع يتصل؟ لحد هلق خسران دولارين

خليل : هههه. داهية؟ ليش شو هـيدي من بنات أفكاري؟ ما هيدي مطبـقينها من سنين وفي محطات فضائية بالعشرات شغالة بهالطريقة

أف أف أف.... فتـلتـللي مخي هلق... لحد هون وصلت الأمور ؟ بس بعد ما جاوبتني على سؤالي

خليل : ولووووو. المذيعة رح تجاوب على كذا إتصال لكل حزورة. بس رح تستـقبل إتصالات من داخل الستوديو يعني إتصال داخلي من بعض الأشخاص يللي بتكون إنتي متفق معهن، وأكيد رح يجاوبوا غلط. يعني مثلا على حزورة الفواكه ، واحد رح يجاوب مشمش وواحد رح يجاوب شمام وواحدة رح تقول موز، وهيك لحين ما يجاوب حدا من زلامك عالجواب الصح ويربح الجائزة، يعني صوريا ... وأحيانا بيخلص وقت المسابقة وما بيكون حدا جاوب صح حتى تحبكها أكتر. أما ليش رح يرجع يتلفن يللي خسر دولارين أول مرة، فلأن المذيعة رح تقول: "بمجرد إتصالك رح تربح مباشرة ماية دولار شو ما كانت الإجابة وهيك المتصل الغبي يللي ضيع دولارين كلفة الإتصال، رح يبقى طمعان بالتماني وتسعين دولار، على الاقل بيعوض خسارة الدولارين... هيدا إذا ما عاد ربح الجائزة الكبرى. وطبعا رح يرجع يستسلم بعد عدة محاولات

طيب واذا حدا إنتبه إنو في لعبة بالدق

خليل : أولا ما رح يتصل إلا واحد غبي متلي. ما أنا طلعت مسطول الشهر الماضي وأكلت الضرب. ويللي رح يـنتبه لهالحيلة، خللي يطـالك إذا بـيطلع بإيـدو، شو بيرفع عليك دعوى بـبلجيكا أو بـيشكيك لمجلس الأمن؟

خليل؟ قوم هلق هلق وروح على بيتك ... داهية إنتي وستماية داهية

خليل : ولك شو قصتك على مهلك...اي شو هي وقفت عليــــــك ؟ واللا فكرك تـفتحلك محل حلاقة رجالي، ومن وراه مرتك تعنطز عالجيران أو تشتري حضرتك شقق وعمارات وتـتفسح بالطيارات

قوم...قوم ولاه.....روح من وجي قــــوم...بـيلي تسترك ستر.....قـــوم وما تورجيني خلقـتك بقـــا

ولك آخ ! إنما الأمم الأخلاق ما بقيت، فإذا هي ذهبت أخلاقهم ذهبوا. بعد ناقص ... إنو  ... إنو يا جماعة ... بـيصير هيــــك ؟؟