خليكن بالخسة نايمين

قتل وتشليح .. رشوة وتشبيح .. سرقة ونصب .. نشل وسلب.. وجع قلب .. جشع وغش .. وما حدا بينتش. قلة ضمير .. مفقودة التدابير .. حاميها حراميها .. وكر دبابير .. حسد وطمع .. ما في تبرير.. لا بتوثق بنايب .. ولا بوزير .. لا بفريق .. ولا بمشير .. والناس آكلتها .. بهدلة وتعتير

 خلصنا بقا.. ودق النفير.. على حسابنا التيكيت .. ولبرا تسفير.. ونحنا بيكفينا.. من البلد تهجير.. لحوم فاسدة.. للجسم مسامير.. وحليب أطفال .. بيسمم شنـتير.. والنصاب مقضاها .. استيراد وتصدير.. وتا يزيد ربحو .. شغال بالتزوير.. وعامللي حالو.. طيب وأمير.. رح يبقى ينفد .. بفعلو هالحقير .. ما الناطور نايم .. وعم يوصلو التجيـير .. والضرر صايب .. الغني والفقير .. الاعمى والبصير .. الكبير والصغير.. والمقمط بالسرير.. البشر والحمير.. والوضع على بعضو .. ممرمر على الأخير

طق الفيش .. نتفولنا الريش .. هالنوفو ريش .. صرنا منـتستر .. بورق عريش .. صحتنا صارت .. بتقطش تقطيش .. وعيش يا كديش .. على أكل الحشيش .. الترويقة زعتر .. والغدا مناقيش .. حياتنا ركض .. على ما فيش ..على لقمة العيش .. منفتش تفتيش .. إن تسهلت الأمور .. منلطش تلطيش .. وإن عسرت معنا .. منلبس طرابيش .. عيشتنا يا محلا ..عيشة الدراويش .. ولك نحنا بشر.. ناس مش كلاكيش

المي بتوصل .. بالقطارة تقطير .. لا في تعقيم .. ولا في تكرير .. وأحيانا مخلوطة .. بمية مجارير.. وعالنبع الناس .. جالوناتها طوابير .. وين الإصلاح .. ووين التغيير .. وين المحاسبة .. ووين التطهير.. وأجواء السياسة .. موترة توتير .. والإنماء واقف .. والملفات بالجوارير .. نكايات ومقضينها .. بالنقار والنقير .. بعمرن ما رح يشيلو ... الزير من البير

 والكهربا مقطوعة .. بتوصل نساسير .. ما بتلحق تجي .. لترجع تطير .. لا جايي بواخر.. ولا واصل بوابير .. ومن كتر القهر .. صلعنا عا بكير .. وأعصابنا اهترت .. ونزلنا بواصير .. أكتر من هيك .. فينا شو رح  يصير

المسؤولية على مين .. مش على طبقة ناس .. بالإقتصاد متحكمين .. من ورا الفساد .. أديش صارو لامين .. وأموات تحت التراب .. أديش صارو طامين .. أراضي وعقارات .. فارزين وضامين .. والحيطان عم تقشط .. على روس البني آدمين .. ريحة الصفقات .. على طول شامين .. والبلد عم يلعط .. بناس مأجرمين .. ونحنا بقرنـتنا .. كاشين وزامين .. ما رايحة إلا على ناس .. مساكين مسالمين

خليكن على بعض .. متـناحرين وناقمين .. أزلام ومحاسيب .. على الزعما حايمين .. مصدقين وعودهن .. بأفكارن مسممين .. متابعين أخبارهن .. على جرابهن عايمين .. ما استوعبتوا بعد .. وحالكم مش لايمين؟ .... اي خليكن بالخسة .. مخدرين ونايمين