حتى بـليلة العرس فـي إلي قـرص

على عرس صديقي وصديقتي كنت معزوم.... وشدوا فيي بنص العرس إلا بتسمًعنا من كلماتك شي ظريف ومهضوم. منيح اللي كنت محطاط ومحضًر شي وإلا كنت انبخعت ... مسكت الميكرفون توجهت للحضور وبصوت عالي رندحت

يا أهل الفرح ... من بعد الرقص والمرح ... بدي وصل هالرسالة ... للعروسين يللي قاعدين قبالي. وصية بدينة العروس حلقة ... ونصيحة للعريس مرتبة ومنمًقة... حتى يستعدوا للحياة الزوجية ... ويكونوا على قد المسؤولية

 يا عريس عروستك أمانة ... بالهنا والسعادة معك حلمانة ... عاشرها بالمعروف ... هي عينك يللي فيها بتشوف.هي نصك التاني وشريكة حياتك ... هي الوردة يللي بتسقيها بدمعاتك ... إنت عندها المال والرسمال ... وما بقا عندها غيرك بالقلب موال

عروستك رح بتهنيك بكرا شوف ... إن قللت أو إن كتـرت المصروف ... لا عينها بالملايين ولا بالألوف ... المهم إنك على طول عليها تلوف. لا رح تفشيلك سر... لا عليك ولا من ورا ضهرك على حماتها رح تبرُ ... ولا عند الجيران رح ياخدها الحديث وعن حياتكن الخاصة رح بتقرً

 وبدي وصيك ترجعلا على البيت بكير ... وإنك بالليل تكون معها سهير. سهر لوحدك مع أصحابك ما بقا في ... مجوز وبطلت عزابي كل شي بيـزعلها تلافيه. وخلي قلبك تجاهها على طول مفتوح ... واشكلها على خصرك المسا وين ما بتروح ... إذا الميزانية بتسمح ضهار إنت واياها وسوح ... وإذا عسرت معك بيتكن للانسجام مفتوح ... في شي كان محرم وصار بعد الزواج مسموح

 وحتى ترتاح بالمية مية... بالأمور المعيشية ... تركلها المالية ... ووزارة الداخلية ... وصر على الصناعة والعمل ... وعلى الخارجية. وزارة الكهربا نسوها كهربا ما في ... إشتراك مولد خمسة أمبيرعلى قدكن كافي

شو حلو الوفق ... بيخلي الحب يدفق دفق ... وراحة البال تصفقكن صفق

 وإنتي يا عروس الهنا ... يللي لابسي الأبيض يا صديقتي أنا. الزواج مش قضية مساواة ... الزواج شركة ومشاركة بالحياة ... مش جيات وروحات ... وشوبنغ وسياحة وسهرات ... وبهورات نتيجتها بالوادي دهورات. الزواج متل الحياة ... فيه خود وفيه هيت ... مش طرف بسمنة وطرف ينقلى بالزيت. إتفقنا إلك المالية ... هو بإرادتو رح بتركلك هي ... فصفي النية ... وتركيلو من مالو وتعب نهارو خرجية. خليلو قرشين يتشبرق ... لوح شوكولاتة ومنقوشة وتنكة بيبسي إذا كان ريقو مطقطق

راعيه واهتمي فيه ... وبحبك وحنانك داريه. وخلي شغل البيت بغيابو ... وما تلتهي بالغسيل وترتيب البيت على حسابو ... أوعي لما يرجع بعد الشغل مستوي ... يلاقيكي غاطسة وعم تكوي ... أو بالمطبخ واقفة عالمجلة مشمرة كمامك وعم تجلي ... إذا  صار على وصول تركي كل شي من إيدك عجلي. اركضي غيري تيابك ... تمشطي وتحمري وتعطري لحبابك ... وإذا دق استقبليه على الباب ... وانقشي بوسة على الخد ما كان حاسبلها حساب ... وشاركيه الأكل وقعدي معو على السفرة ... وابتسمي ما تقعدي بوجو يا تنقي يا صادة نفسك ومكشرة. وهيك بيصير يحب يجي عالبيت ... ويسهر معك ويتابع غصب المسلسلات

شو حلو الوفق ... بيخللي الحب يدفق دفق ... وراحة البال تصفقكن صفق 

يا عريس ... لا تنسى تزور أبوك وإمك ... وتطل بالمرة على مرت عمك وعمك. أوعا تنسى أهلك يللي ربوك ... وشربوك حليب نيدو لحتى كبروك

 يا عروس ... سايري حماتك بتلاقي جوزك عم يكرم أبوكي ... اعملي حساب لأهلو بيعمل حساب لأهلك اللي خلفوكي

أنا كل القصد سليكن ... ويكون الإحتفال منوع وعلى طريقتي يا عرسان هنيكن

  لا يكونوا العرسان زعلوا مني ... أنا عم خبر الجارة حتى تسمع الكنة ... والحكي كلو على هالأساس مبني

وشكرا للحضور الكريم ... من أهل العريس لأهل العروس لكافة المعازيم. تبقى الأفراح عامرة وبدياركم زاهرة ... وللعروسين بختم بتهانيي الحارة