كـلو نسـوان بنسـوان

خليل : يا حبيبي إنت ما رحت تبطلها هالعادة. كل ما بزورك بلاقيك مدبرس وعايف حالك

ليك ... هلق ما تزدلي على قلبي. قلبي من الحامض لاوي

خليل: هات حتى نشوف كل مشكلة وإلها حل

خيي دشروني من الشغل انبسطت هلق

خليل : له له له ... شو هالخبر . فاجأتني .ليش؟ وشو صار؟

ما صار شي. شركتنا بأزمة مالية وعم تخفف عدد الموظفين. مع كل كفائتي ومجهودي، طلعوني برا أنا وخمسة من زملائي الشباب

خليل : اي... كالعادة، يللي ما عندو ضهر ولو شغلو دغري بيشيلوه، والمحتال المقطع الموصل وقليل الضمير صاحب الواسطة بيخللوه

لا يا حبيبي الوضع عنا مختلف. صاحب الشركة بكل بساطة، استغنى عن الشباب وخلى النسوان. صار بالشركة في عشر موظفات وتلات شباب

خليل : يا عين. فهمت وأكيد هالنسوان حلوين ونغشين، أو سهلين ومزنطرين ما هيك؟ وإنتو الرجال انذلوا ودبروا حالكن عن جديد بشي وظيفة إذا بيطلع بإيدكم، وتشردوا إنتو وعيلكن

لقطتها يا خليل. يعني على هالمعدل، صارت النسوان بتشتغل والرجال بتهتم بشغل البيت. والمرا بترجع من شغلها عالبيت بتلاقي جوزها معزل البيت ومحضر الطبخة. بيستقبلها عالباب بكل ترحيب والوزرة على خصرو. بـيقللها يعطيكي العافية. وهي كيف مدبرة حالها بالشغل ومزبطة أوضاعها ومسيسرة أمورها، الله أعلم فيها

خليل : خيي في نسوان هيك وفي غير هيك مش كل صابيعك متل بعضهن

مش مختلفين. بس هيدا عامل خلل بالمجتمع على عدة مستويات. معك خبر إنو في بلدان بس تقدم طلب توظيف لشي شركة، ممنوع تحط إسمك وصورتك وجنسك إذا دكر أو إنتاية على طلب التوظيف؟. وكل هيدا حتى ما يتم الإختيار إلا على مقياس الكفاءة. ولك مشكلة يا خليل، مشكلة عويصة. تجارة الأجساد ماشية ركض. في كتير نسوان بتبيع وفي كتير رجال بتشتري يا عيب الشوم على الـتنين. شفلي هلق شو بشتغل؟ رقاصة... مغنية ... ممثلة... مذيعة ... تبعت مساج؟ دايما بيطلبوا وجوه جديدة، أنا مش وج جديد؟؟

خليل :هههه. لأ ما بيمشي حالك إنت. هيدي شغلة نسوان وبتطلب أحيانا مجهود إكسترا ما إلك طاقتو. خيي حتى المرا لو كان عندها إمكانيات بالغنا أوالتمثيل أو صوتها إذاعي ومخارج الحروف عندها سليمة، بأغلب الحالات بدون واسطة أو مرور باختبار من نوع خاص ما فيها تقلع. هيدا عصر المادة والمصالح الدنية

وشو هيدا الإختبار الخاص؟ أول مرة بسمع فيه

خليل : بسلامة فهمك. يعني بأغلب الحالات حتى تقلع المرا بمهنة من المهن يللي ذكرتها، بدها تقدم خدمات خاصة لصاحب السلطة والنفوذ حتى يدعمها، إن كان بإذاعة أو تلفزيون أو شركة إنتاج ويا دلها إذا بتقطع عنو شي نهار التموين، بيصير بيدعم غيرها وكل واحدة بسعر. وهيدا يا حبيبي حال كتير من المؤسسات الفنية والاعلامية. بعدين تعا لهون، يللي بيسمعك يمكن يخطر ببالو إنك ناقم على النسوان؟

لأ يا خليل. أنا عم إحكي عن صنف معين من النسوان مش عم إحكي عن النسوان الشريفات العفيفات المحترمات. أصلا يللي عم يشجع موجة الإنفلات والفلتان هيدي، هني رجال من نفس الصنف. المقصد إنو أنا كرجال مستقيم، صارت حظوظي حتى لاقي شغل قليلة وكل خبرتي وشهاداتي رايحين ضيعان. اتطلع على الجرايد وشوف. مطلوب مندوبات مبيعات، مندوبات تسويق، سكرتيرات، عاملات هاتف، فتيات للرقص الشعبي

خليل : يا زلمي، طول بالك.. يعني إنت كرجل، إذا بدك تفوت على شركة حتى تبيع موسوعة كتب أو تعرف عن الخدمات والمنتجات يلي بـتبيعهن شركتك، بيستقبلك المدير المسؤول؟

لأ. إذا ما كانت دوموازيل حلوة أو مشفلقة ما بيسـتقبلوها ولا بيسمعولها. على إساس إنو بـيرغوا معها بالحكي حتى يموهوا عن نفسهن شوي، بـيشيلوها ويحطوها من فوق لتحت، والباقي مفتوح على عدة احتمالات

خليل : يعني العلة والتوك بهيدا الرجال المسؤول يلي عينو فارغة وعلى الرجال يللي على طرزو

يا خيي مزبوط، بس كمان في نسوان أسلوبهن رخيص بطريقة شغلهن. بس هيدا الحكي كلو ما بيحللي مشكلتي ولا مشكلة هالشباب يللي بتخرج منهن الجامعات ما هب ودب، بدون ما يكون في سوق عمل إلهن

خليل : معك حق. برأيي المتواضع، ما إلك إلا تـفتش على وظيفة برات هالبلد. بلد عندو قوة إقتصادية ومالية. بلد منتج، كفاءتك فيه هي واسطتك وعلى قد ما تعطي من مجهود وخبرات بـتـترقى وبـتـقبض. هيدا البلد خليه لسياحة الفن الهابط. خليه للناس يللي ما بتهمها مصلحة بلدها. للناس يللي بتركض بس على مصالحها الخاصة على حساب الوطن والمجتمع. خليه للوسايط والمحسوبيات والتعيينات يلي عن أبو جنب، خليه لكوتة الطوايف على حساب الكفاءة. فلان زلمة فلان وهالمركز من حصة طايفة فليتان 

لأ يا صديقي لأ ... أنا هون باقي وصامد. إذا كل واحد نضيف بدو يترك البلد رح تصير البلد بخبر كان. صامد هون بلا دموع وبكل عنفوان. صامد بوج الأمواج والريح. وما حدا رح يقدر يقطع الحبل يللي بيربطني بوطني. رح كسر بواب اليأس وإتسلح بالصبر وبالأمل بمستقبلي ومستقبل هالبلد

خليل : اصطفل. فالج لا تعالج. هيدا البلد رح يبقى هيك، دقي واعصري. بكرة ما بتطلع إلا براسك وأنا هون وإنتي هون